Sex Worker

Ang paghikog ni Ryan, ang pari nga nahimo kong kustomer nga Padre Christian diay ang matuod nga ngalan, nakapahinuklog nako. Morag nakonsensiya sab ko sa iyang kamatayon. Ambot ba? Morag wala ko makasabot sa akong kaugalingon.

Ang nahitabo kang Padre Christian morag naghimog milagro sa akong kinabuhi. Nakahukom kong  mag-usab na sa akong pagka tawo. Biyaan ko na ang pagpanginabuhi pinaagi sa pagbaligya sa akong unod ngadto sa hangol nga kalalakin-an.

Tuod man, wala nako moadto sa among area nianang pagkagabii. Bug-os na ang akong hukom pagtalikod sa akong trabaho isip usa ka commercial sex worker. Pagkasunod adlaw, gisugdan na nako ang pagpangaplay og trabaho. Gusto kong makabaton og desenteng trabaho nga dili makaguba sa kinabuhi sa ubang mga tawo.

Pero pulos walay job vacancy ang tanang mga establisamento nga akong giaplayan. May mga department store nga nang-hire og dugang mga trabahante apan  mao ra may ilang dawaton ang mga college graduate. Dili ko mo-qualify sa ilang requirements.

Sa kadugayan nakong pangaplay nga pulos balibad ang akong naangkon, giabot kog kalaay. Nakahunahuna ko nga kun dili gyod ko makasulod og trabaho, mobalik na lang ko sa kanhi kong trabaho isip commercial sex worker.

Usa ka higayon niana, misulod ko sa usa ka mall. Wala damha nga magkakita kami si Arman, ang kanhi kong kustomer nga tihik kaayo. Miasenso na diay siya. Gani, nakatag-iya na siyag cellshop nga nahimutang ra usab sulod sa mall. Pagkasayod niya nga nangita kog trabaho, gitanyagan dayon ko niya nga motrabaho sa iyang tindahan. Gidawat ko ang iyang tanyag human masuta nga seryoso siyang motabang nako.

Adlawn'ng Domingo. Day off nako. Misuroy ko sa siyudad. Pagsulod nako sa usa ka kan-anan aron mokaon, nasigpatan ko si Brandon, lain nakong kustomer kaniadto. Kauban niya ang iyang asawa ug mga anak. Malipayon silang nangaon. Nalipay sab ko nga nakasud-ong kanila nga nagmalipayon na. (Kataposan)