Nakasabot ka nga ingon na napikal si Takeshi sa imong pagpagahi-gahi pagsanong sa gisulti niini. Apan sa pikas bahin, namatikdan sab nimo nga ingon sa may gikahadlokan siya, Jamaica. Morag may dako siyang kabalaka.
"Don't create trouble for us, Jamaica," nagkanayon si Takeshi samtang nagpamahid sa iyang singot. "Just see him."
"Haven't you heard?" Gisinghagan mo ang club manager sa bar nga imong gitrabahoan. "I told you. I don't want to see that monster."
Nakapanglingo si Takeshi sa imong gisulti. Napahit niya ang iyang wait. Bisan nangluspad ang iyang panagway apan nakasabot kang naglagot siya.
"O, c'mon, Jamaica," ni Takeshi pa. "Nobody says like that to the big boss. You lose your job or your life."
"What?" Nakasukna ka sa kahikugang sa ulahing gisulti ni Takeshi.
"Just do what I say, Jamaica and you'll not have any problem," sa Hapon pa.
Gikuyawan ka sa gisulti ni Takeshi. Lain kinig kahulogan alang kanimo. Morag dunay mga sekreto nga wala pa nimo masayri sa bar nga imong gitrabahoan. Ug ang kakuyaw nga imong gibati milubad ngadto sa pagkalukmay sa imong hunahuna maong napugos ka pagtuman sa gimando sa club manager kanimo.
Milakaw ka paingon sa lamesa nga nahimutangan ni Yukiko. Gisugat ka niya sa iyang pagkamatikod sa imong pagdanga-danga. Mibukal ang imong dugo sa kalagot pagkakita sa tawo nga mipasipala ug nanamastamas sa imong pagka babaye. Pero nagpugong ka sa imong kaugalingon. Nasayod kang wala kay dag-anan kun magsinuplada ka.
"Jamaica, I want you to meet my Big Boss," daw mapasigarbohon kaayo si Yukiko nga namulong. "Zen. Big Boss Zen.'
"It's a pleasure meeting you, Jamaica," matud sa gipailang big boss nga nagpahiyom nga mitunol sa binukhad niining palad aron makiglamano kanimo.
Bisan bug-at sa imong buot apan nakiglamano ka kang Zen. Gipig-it pag-ayo ni Zen ang imong palad. Paglugak niini, nakita mo ang pungkol nga kumingking niini. (Sumpayan pa)