Dula sa pangandoy ug panimalos

Samtang gipana-mastamasan pag-ayo ni Yukiko ang imong pagka babaye, nagbangotan sa tumang pagsupak ang tibuok mong pagka tawo, Jamaica. Gumikan sa imong pangandoy nga mahaw-as sa kalisod nahisugamak ka sa usa ka kahimtang nga nahisama ka sa usa ka mananap nga gitambog ngadto sa nagdilaab nga kalayo.

Taliwala sa sinalbahis nga pamaagi ni Yukiko sa pagpakig-sex, imong naamgohan ang kapait sa kinabuhi. Mao na kiniy linugdangan sa imong kakursonada. Sa imong pagpakigdula sa mga lalaki, nakasugat ka na gyod og tawo nga mas labaw pa kanimo katig-a og balatian. Ug nahulog ka sa kaalaotan sa mga kamot sa maong tawo -- si Yukiko!

Belib ka ni Yukiko sa natad sa sex. Bisan kapila na niini angkona ang imong pagka babaye apan wala pa gyod kini batiag kakapoy. Sakto kinig enerhiya. Ambot kun unsang matanga sa energy booster ang gigamit sa Hapon nga taas man kinig lahutay sa sex. Lagsik pa kaayo ang Hapon human sa pila ka round niining pagpahimulos nimo.

Sa laing higayon, mitapuko na usab si Yukiko kanimo. Inanay kang gibitad sa kaluya. Wala gyoy care si Yukiko kanimo. Nagpadayon siya sa pagpahimulos nimo bisan iyang nakita nga nanglumoy nag maayo ang imong lawas. Ug nakuyapan ka na usab.

Dihang naulian ka na sa panimuot, maoy nasugat sa imong panan-aw pagbuka sa imong mga mata ang tulo nimo ka kaubang Japayuki nga nag-apong kanimo. Imong nasuta nga ania ka na sa flat sa imong gipuy-an. Misantop sa imong hunahuna nga tingali gihatod ka ni Yukiko kagabii human siya matagbaw sa pagpanamastamas nimo.

Sa imong kaugalingon, hilom kang nakapasalamat nga bisan  sa miserable nimong gidangatan sa mga kamot ni Yukiko, nakabalik ka pang buhi sa flat nga imong gipuy-an. Maayo gani kay wala ka patya ni Yukiko bisan iya kang gipasipad-an. Apan imong nakita ang kahingawa sa tulo nimo ka kaubang Pinoy entertainers sa imong gidangatan.

"Aguroy!" Nakatuaw ka sa dihang misulay kag lihok aron mobangon.

"Ayaw una pagbangon," nagkanayon si Cristy. "Pahuway lang una."

Gipiyong mo ang imong mga mata kay gipiog ka sa tumang kaluya. Apan dili ka sab makatulog kay gibati mo ang pagpanakit sa tibuok mong lawas tungod sa mga samad ug bun-og nga imong naangkon. (Sumpayan pa)