Mikunot ang imong agtang samtang nagtutok kang Maynard, Jamaica. Wala ka makasabot sa logic sa iyang gisulti. Kay mabaw ka ra man sab lagi'g panabot maong dili kaayo ka makatugkad sa lawom nga sinultihan ilabi na sa sama kang Maynard nga usa ka propesyonal. Mao nga nangayo ka sa iyang explanation.
"Dili na virgin si Casilda dihang naangkon ko ang iyang pagka babaye,"nagkanayon si Maynard. "Dili sama nimo nga nakaseguro kong ako gyod ang unang babaye sa imong kinabuhi. Ako gyod ang naka-virgin nimo, Jamaica."
"Nan, nganong si Casilda man ang imong pakaslan?" Gipangutana mo si Maynard.
"Praktikal nga rason, Jamaica. Bugtong anak si Casilda sa iyang mga ginikanan busa bugtong siyang sumusunod sa ilang katigayonan. Mao nga gusto kong manghantok. Makahatag si Casilda og seguridad sa akong kaugmaon. Dili na kinahanglang manarbaho pa ko kay kuwartahan na man si Casilda. Whereas kun ikaw ang akong pakaslan kabuktot kog panarbaho sa barko aron ta mabuhi. Mao nga si Casilda ang akong gipili."
"Mao man diay kana ang imong plano, nganong gibuong mo pa man ang akong pagka babaye? Nganong imo pa man kong gihilabtan?"
"Garbo sa pagka lalaki ang hinungdan, Jamaica. Gusto kong makatilaw og virgin sa dili pa ko magpakasal kang Casilda. At least, bisan dili ako'y naka-virgin sa akong maasawa, may kasinatian ko sa pagpakig-sex sa usa ka virgin. Ug kana mao ikaw, Jamaica. Wala ko mapakyas sa akong tuyo kay ako man gyoy naka-virgin nimo."
"Nonsense nga katarongan. Haguka. Binata!"
"Pero dakong credit sa akong pagka lalaki ang nahitabo nato, Jamaica."
Wala ka na motubay sa ulahing gisulti ni Maynard, Jamaica. Gitapos mo na ang inyong panagsulti human nimo masuta nga wala ka nay makuha gikan kaniya ug dili ka na angay molaom nga makabaton pa'g katumanan ang inyong gugma. Karon pa nimo masayri nga igo ka lang diay gipahimuslan ni Maynard.
Ang gugma nga imong gibati kaniya kalit lang gipulihan sa naghingapin nga kasilag. Sa dayon mo nang biya sa Marcelo Beach, imong gilud-an ang nawong ni Maynard.
(Sumpayan pa)
