Sex worker

Gula 8

Tungod lagi kay magabii man ang akong itrabaho isip usa ka commercial sex worker, sagad udto na kong makamata. Sagad man god mahitabo nga kaadlawon o buntag na kong makatulog. Mao nga kasagaran sab mahitabo nga usahon ko na lang ang akong pamahaw ug paniudto. Ingon niini ang dagan sa akong kinabuhi.

Usa niana ka udto nga mao pa gyuy pagkahuman nakog kaon, may nanuktok sa pultahan sa balay nga akong giabangan sa squatter’s area. Nahibulong ko kay wala man koy gipaabot nga bisita. Gawas pa, walay laing nasayod kun hain ko magpuyo. Bisan gani ang akong mga kauban nga mga babayeng mugbog lupad wala man masayod kun hain ko magpuyo kay wala ko man sila tug-ani sa dapit nga akong gipuy-an.

Aron masayran kun kinsa ang nanuktok sa gawas sa balay, akong gibuksan ang pultahan. Maoy akong nakita ang bayhon sa usa ka babaye nga nagbarog sa gawas. Wala ko makaila sa maong babaye. Nahibulong ko nganong nahiabot siya sa akong gipuy-an.

“Maayong udto,” miuna pagtimbaya ang babaye.

“Maayong udto sab,” mibawos ko pagtimbaya. “Unsay ato?”

“Ikaw ba si Sonia?”

“Oo. Nga-ngano man diay?”

“Ako si Melodina.”

Naglamanohay mi. Unya gipasulod ko siya sa balay nga akong gipuy-an. Gipalingkod ko siya sa single sopa sa may sala. Unya milingkod ko sa iyang atbang.

“Unsay gusto mong imnon?” Gipangutana ko si Melodina. “Juice? O kape?”

“Ayaw na lang,” mibalibad siya. “Busog pa ko.”

“Ikaw ang mag-igo.

“Diretsohon ko na lang ang pagpadayag sa akong tuyo nimo.”

“Unsa kana?”

“Gusto kong masayod ka nga ako ang asawa ni Brandon.”

Nakugang ko sa akong nadungog. -- Sumpayan pa