Cebu City
Ako gihapon ang letihimong presidente sa atong nasud! Busa kinahanglan nga maghiusa ta sa pagpalagpot sa peke tang presidente!
"Ilisan ang kolektor sa Bureau of Custom kay andam na kong mopuli kaniya...!"
"Kun mahimo, hakpon ko ang tanang salapi ug bahandi sa kalibotan aron ako ang yukboan sa tanan...!"
"Gikinahanglan nga molampos kitang mga oposisyon aron makontrolar ta ang gahom sa atong kagamhanan...."
"Panulis, panghold-up ug pang-isnat maoy bugtong sulbad aron matambalan ko ang kauhaw sa pinansyal kong panginahanglan..."
"Di ko gustong mailisan sa akong katungdanan, busa gikinahanglan ang bisan unsang matang sa maniobra sa pagtikas aron ako modaog sa eleksyon..."
"Makabuang ang katahom mo! Ayaw kabalaka. Di lagi mahibaw-an sa imong bana ug sa tigre kong asawa ang kinawatkawat tang relasyon!"
Daw nabungog si Rudy sa nagkalandrakas ug nagkaguliyang tingog sa kamatuoran nga nagladlad sa mga panghitabo diha sa katilingban nga atong gipuy-an karon. Ang way kataposang pagka-uhaw sa tawo ibabaw ning kalibutan!
Ug daw nahigmata si Rudy sa iyang kaugalingon. May dakong kahimatngon nga kalit mihunob sa iyang galamhan ning udtoha nga naminaw siya sa mga mamumulong sa gipahigayong pagpamalandong sa kataposang pito ka pulong nga gilitok ni Hesukristo sa krus, atubangan sa simbahan sa Katedral.
Nanubod ang daghang singot sa iyang lawas. Nakasala si Rudy sa buotan niyang asawa. Naglimbong siya sa minahal niyang kapikas sa dughan! Nakaako siya sa pagpangabit og usa ka batan-ong dalaga nga gipuyo pa gayud niya sa usa ka desenteng apartment.
Miuliot si Rudy sa bagang duot nga tapok sa tawo. Misulod siya sa Katedral. Ug atubangan sa dakong imahen ni Hesukristo nga nagdupa sa krus, miluhod siya. Mihangad. Unya, gipiyong niya nga iyang mga mata.
"Diyos ko, dawata kining kinasingkasing kong paghinulsol! Karon, magasaad na ko sa bug-os nga magbag-o na sa akong kinabuhi. Biyaan ug pasabton ko na lang ang akong kabit ug ikompisal ko sa akong asawa ang tanan kong kasal-anan ug paglimbong kaniya!" lawom nga nangagho si Rudy. "Unta, malamdagan usab sa paghinulsol ang tanang makasasala nga dili na uhawon sa pagpakasala, gikan karon ug hangtod na sa kahangtoran....!"
Nanguros si Rudy sa tumang kamatinud-anon. (Kataposan)