Sex slave

Gula 67

Gusto nakong sutaon kun tinud-anay ba ang pagpangulitawo ni Shawn kanako. Basin iya lang kong gibugalbugalan. Dili man god ko makatuo nga iya kong panguyaban bisan mabdos kong dako ug hapit na gani manganak.

“Itakli na lang sa lain ang imong gugma, Shawn,” giingnan ko siya. “Dili ko makadawat sa imong gugma. Dili kita angay sa usag-usa.”

“Ayaw ko tudloi nga mahigugma sa lain, Bonita,” nagkanayon si Shawn. “Ikaw ang akong gihigugma sukad pa kaniadto. Kun sugton ko nimo, magpakasal dayon ta.”

“Hatagi una ko’g igong panahon sa paghunahuna niining tanan.”

“Andam kong magpaabot, Bonita.”

Sukad niadto, kanunay nang mamisita si Shawn nako. Gipadayon gayod niya ang pagpangulitawo nako. Nakagusto sab niya sila si Papa ug Mama.

Sa laing bahin, si Tiyo Camilo kanunay sab mangitag higayon nga magkasulti kami. Kanunay niyang gipangayo ang akong pasaylo apan gihikaw ko kini kaniya. Maoy mipatigbabaw sa akong galamhan ang kasilag kaniya tungod sa iyang pagpanglugos nako.

Wala gyud nako pakitaig maayong pagtagad si Tiyo Camilo bisan sa atubangan nila ni Papa ug Mama. Ang akong mga ginikanan nagmatingad-on sa gipakita kong taras.

“Ngano bang ingon sa may kasuko ka man ngadto sa imong Tiyo Camilo, Bonita?” Gipangutana ko ni Mama usa ka higayon niana. “Mora man og nasilag ka kaniya?”

“W-wa man, Ma,” maoy akong tubag. “Dinala lang tingali kini sa akong pagmabdos.”

Wala na mangutikuti si Mama.

Nanglabay ang mga adlaw. Nagpadayon si Shawn sa pagpangulitawo nako. Wala ko pa gihapon siya pasaligi. Gusto nakong sutaon sa akong kaugalingon kun may pagbati pa ba ako alang  kaniya.

Si Tiyo Camilo sab wala gayod mohunong sa pagpangayo sa akong pasaylo. Apan wala ko gayod siya pasayloa. Nag-awas  ang gibati kong kasilag kaniya. Siya’y naka-ingon nga naguba ang akong kaugmaon. Hangtod nga usa ka adlaw niana, miabot kanako ang masulob-ong balita. Naghikog si Tiyo Camilo! -- Sumpayan pa