Himongaan nga nahunong og putakputak

Lacaron, San Fernando, Cebu

Unsa katinuod Masyong, nga nag-iring-iring kuno kamong duha ni Kumare Eser, duol sa may sapa sa Kapangian, diin  matud pa sa tabi adto kamo mag- romansahay?" misinggaak sa tumang kalanog ang tingog ni Noring, nga maoy gisugat kanako nga gikan nga nagpalunang sa akong kabaw.

"Tibtiban ko gayod ang ngabil nianang nagpasagad og tabi ning wa maglito kong sanggot? Dila ra unya ang way labod sa oras nga akong hibaw-an kun kinsa kanang tawhana ang nagpadagan og tabi nga dili mao!!" naitlib ko og ahat ang akong dila sa tumang kalagot.

"Basta pag-amping lang gayod Masyong, kay sa panahon nga hisakpan ko kamong duha sa akto ... dili unya ikaw magmahay kanako!" dihay bahad ni Noring nga niadtong higayona ingon sa nagpangagot ang bag-ang.

Adlaw kadto nga Sabado. Kilumkilom na ako nga nakalugsong gikan sa gibaol kong yuta, nga pugsananan og duha ka gantang nga binhi sa mais. Samtang naglugsong ako sa may banghiligon nga dalan diin akong giguroy ang kabaw kay palunangon, kalit ako nahalingi kay may midagpi sa akong buko-buko. Sa sinugdan wa ko lang kadto panumbalinga, apan sa akong paglingi si Kumare Eser man diay ang diha sa akong luyo nga mapahiyomon ug nagkanayon:

"Sa kadaghang magtiayon nga nagbuwag gumikan sa way hinungdan kong tabi ... ikaw pa tingali Masyong, ang tinud-on ko og way hinungdan nga tabi, aron magkabuwag kamo si Noring?" hupong sa kamatinud-anon ang tuno sa sinultihan ni Porlang, ang nanggungis nang dalagang guwang, nga nag-inusara na lang og puyo sa may bukiran sa Kapangaian.

"Sa unsang hinungdan Porlang ... nga ako pa man ang imong giinitan? Dili ka ba maluoy kanamong magtiayon nga magkabuwag sa among panagtipon ni Noring, gumikan lang sa imong tinumo-tumo nga tabi? Kun mahimo ... Porlang, mintras sayo pa bakwia kanang tabia atubangan ni Noring, nga kami si Kumare Eser, nag-iring-iring sa may dapit sa sapa?" hapit na lang ako moluhod sa atubangan ni Porlang.

Ambot unsang hitaboa, nga kalit man lang ako gigakos og hugot kaayo ni Porlang, diin gibitad niya ang akong kamot kay manulod kaming duha sa ilang payag? Mao na lamang ang akong namatngonan, nga hilabihan nga nakahangos si Porlang ug nagkanayon:

"Karon nga nakatilaw na ako Masyonggggggg ... sugod karon dili na ako magputakpotak sama sa himungaaaaan!

"Diliiiiiii ..aaaaaa!" (Kataposan)