Sex slave

Gula 66

Wala nako tug-ani sila si Papa Adolfo ug Mama Odella sa matuod nga hinungdan sa akong paglayas-layas ug pagtago-tago. Nangita kog alibi. Dili ko gustong matuki nga ang paghimong sex slave ni Tiyo Camilo nako maoy hinungdan nga miundang ko sa pagtungha. Bahin sa bata nga akong gisabak, wala sab ko motug-an nila nga minyo ang lalaki nga nakamabdos nako.

“Pasayloa ko sa akong mga nabuhat, Pa, Ma,” nako pa.

“Gipasaylo ka na namo, Anak,” si Mama Odella ang mitubag. “Ug nalipay mi nga nahibalik ka na kanamo. Salamat nga mipauli ka na.”

Milabay ang usa ka semana. Usa niana ka adlaw, mitungha si Tiyo Camilo sa among pinuy-anan. Naatol kadto nga wala sa balay sila si Papa ug Mama. Gikuyawan ko kay tingalig unsa na say iyang buhaton nako karon nga nasayod na siyang mibalik na ko sa Isabel. Naglagot ko sa akong pagkakita niya.

“Pasayloa ko, Bonita,” nagkanayon si Tiyo Camilo. “Nagbasol na ko sa akong gibuhat nimo.”

“Bisan kanus-a dili ko ikaw mapasaylo, Tiyo,” giingnan ko siya. “Ikaw ang nakaingon sa pagkaguba sa akong kinabuhi ug kaugmaon.”

Huyhoy ang mga abaga ni Tiyo Camilo nga mibiya sa balay dihang ako na siyang gihinginlan. Gilambahan ko siya sa sera sa pultahan. Naglagot kog maayo niya.

Pagkasunod adlaw, maoy akong bisita si Shawn, ang kanhi kong admirer. Nasayod na diay usab siya sa akong pagbalik sa Isabel. Nasayran ko nga biyudo na siya. Namatay ang iyang asawa siyam ka bulan na ang nakalabay. Namatay kini sa pagpanganak sa una nilang liwat. Batan-on pang nabiyudo si Shawn.

Subling nangulitawo si Shawn nako. Apan gikataw-an ko lang siya.

“Mangulitawo ka nako bisan ingon niini ang akong kahimtang nga usa ka dakong mabdos?” Gisukit ko siya.

“Andam kong mangamahan sa imong anak kun imo kong sugton,” niya pa.

Wala ko makatingog. Igo lang kong mitutok niya. -- Sumpayan pa