Sex slave

Wala dayon motubag si Leemar sa akong pangutana. Miginhawa siyag lawom ug unya gikumot ang iyang ulo. Mibati kog kahingawa sa gipakita niyang lihok.

"Sultihi ko, Leemar," matud ko. "Unsa ang giingon mong kakulian nga imong nasugatan? Please, tug-ani ko sa matuod."

"Nia sa Cebu ang akong asawa, Bonita," nagkanayon si Leemar.

"U-unsa?"

"Mao kana. Didto siya sa akong gitrabahoan kaganina. Nagkasulti na kamig maayo. Sangkot sa langit ang iyang kahiubos nako. Nasayod na siya mahitungod sa atong relasyon. Kini ang hinungdan nga miagpas siya nato dinhi sa Cebu."

"Giunsa man niya pagkasayod nga nia ta sa Cebu?''

"Nagsuhol siyag detektib aron maoy mangita nato. Dihang natultolan na kita sa detektib, mianhi na ang akong asawa sa Cebu aron makigkita nako."

Wala ko motingog. Wala ko kalikayi nga mobatig kahasol sa kasayoran nga akong nadawat. Alang nako, pasidaan kini sa mas komplikadong sitwasyon.

"Ang imong karelasyon nga tomboy maoy nagtug-an ngadto sa akong asawa mahitungod sa atong relasyon," tug-an ni Leemar nako. "Mihimo gyod og paagi ang tomboy nga dili magpadayon ang atong relasyon."

"Nganong nakaila man si Charlotte sa imong asawa?" Gisukit ko siya.

"Nagtuo ko nga gipanid-an sa tomboy ang atong mga lihok. Tingalig naghimo siyag pakisusi mahitungod sa akong pagka tawo maong nailhan niya ang akong asawa."

"Hain man karon ang imong asawa?"

"Tua siya sa Mandaue, sa balay sa iyang ig-agaw. Dili siya gusto'g eskandalo maong wala siya mosulong dinhi.''

"Unsa may inyong gipanagsultihan kaganina?"

"Iya kong gipapili kun kinsa kaninyong duha ang akong palabihon."

"Unya, kinsa man kanamo ang imong pilion?"

Wala makatingog si Leemar. (Sumpayan pa)