Gula 59
Gikabig ko ni Leemar paduol niya. Gipalingkod ko niya sa duha niya ka paa ug gigakos. Dayon gihagkan niya ang akong aping ug gialam-alaman.
“Ayaw nag hasola ang imong kaugalingon mahitungod sa akong pamilya,” nagkanayon si Leemar. “Wa masayod ang akong asawa nga nakigrelasyon kog laing babaye. Labaw sa tanan, wala siya masayod nga nia ko sa Cebu uban sa usa ka babaye.”
“Mahimong wala pa siya masayod sa pagkakaron,” matud ko. “Apan nakaseguro kong moabot ang panahon nga masayod siya sa tinuod nga hinungdan sa kalit mong pagkahanaw didto sa Ormoc. Seguradong sakitan gyud siya sa imong gibuhat, Leemar.”
“Kun unsa man unya ang mahimong linugdangan niining tanan, andam kong modawat kun unsay silot nga ipahamtang sa akong asawa nako. Ang importante alang nako mao nga nagkauban ta karon, Bonita.”
Ug naanod mi sa kalimbatianon sa higayon. Gihagkan ni Leemar ang akong aping ug ngabil. Nagsinukliay mig mga halok. Unya, kadali rang nakatangtang si Leemar sa mga salimbong sa among lawas. Iya kong gipahigda sa katre ug giangkon niya ang akong pagka babaye. Nagdungan mig sangko sa kinapungkayan sa himaya.
Pagkaugma, milakaw si Leemar human sa pamahaw aron mangitag trabaho. Kinahanglang makakita dayon siya’g trabaho alang sa among survival samtang nia mi sa dakbayan sa Sugbu. Wala ra ba miy kabanay nga kadangpan dinhi. Gawas pa, nagtago-tago mi dinhi sa Sugbu maong dili kami buot nga matultolan ni bisan kinsa nga nakaila namo, kabanay man o dili. Mao nga kinahanglang makabarog mi pinaagi sa kinaugalingon nga paningkamot dinhi sa siyudad.
Gibuligan ba kaha sa kahigayonan, nakakita dayon si Leemar og trabaho. Usa ka general services ang kompaniya nga iyang gisudlan. Mininum ang suweldo.
“Kanus-a ka man magsugod?” Gipangutana ko si Leemar.
“Ugma dayon,” tubag ni Leemar.
“Maayo hinuon kun mao kana.”
“Ikaw ang akong inspirasyon sa akong pagtrabaho, Bonita. Alang kanimo ang akong paningkamot ug ingon man sa umaabot tang anak.” -- Sumpayan pa