Sex slave

Gula 56

Kadali ra ming nagkasinabot. Ang Cebu maoy napili namong dapit nga adtoan kun mobiya na kami sa Ormoc. Maayo didto kay dakong siyudad. Walay nakaila namo didto.

“Kanus-a man ta manglayas?” Gipahunat ko si Leemar.

“Paaboton lang nato ang atong suweldo sa kataposan sa bulan,” matud ni Leemar. “Mas maayo nga duna tay kuwarta nga magamit kun tua na unya ta sa Cebu.”

“Tingsuweldo na man sa Biyernes.”

“Husto ka. Busa pangandam sa imong kaugalingon kay inigkagabii sa adlaw’ng Biyernes manglarga na kita paingon sa Cebu.”

Tuod man, nangandam ko. Bug-os na ang akong hukom nga mokuyog kang Leemar. Ingon sa gisalig ko na lang gayod kaniya sa hingpit ang akong kapalaran.

Nianang pagka Biyernes sa buntag, nahiabot si Leemar sa among gitrabahoan nga nagdala na sa dakong travelling bag nga gisudlan sa iyang mga gamit. Andam na siya alang sa among paggikan paingon sa Cebu nianang pagka gabii.

“Wa ba magduda ang imong asawa kun nganong nagdala kag daghang mga gamit?” Gipangutana ko si Leemar samtang padayon ming nagtuman sa among mga gimbuhaton sa bodega sa tindahan nga among gitrabahoan.

“Gibakakan ko siya,” matud ni Leemar.” “Gipatuo ko siya nga mobiyahe ko uban sa atong manager ngadto sa Tacloban maong wa na siya mangutikuti.”

Pagkaudto, gipahimuslan ko ang 30 minutos nga break alang sa paniudto. Midalikyat kog pauli ngadto sa boarding house nga gipuy-an namo ni Charlotte. Gidali kog panghipos ang akong mga butang. Pagkahuman, mibalik dayon ko sa akong gitrabahoan.

Sa hilom mibati kog kaluoy kang Charlotte. Dili nako mabanabana ang bation niyang kasubo kun sa iyang pagpauli unya sa hapon tumang kamingaw ug kahaw-ang ang mosugat kaniya sa among lawak kay ako na man siyang gibiyaan.

Pagkahapon, gipanghatag na ang among suweldo.

“Asa na man ta ron?” Matud ko sa amo nang pagpanggawas sa opisina sa cashier.

“Mo-check in una ta sa hotel,” ni Leemar pa. “Nakanselar man diay kuno ang biyahe karong gabii.” -- Sumpayan pa