Nasunggo ilong sa bampira

Panadtaran, San Fernando, Cebu

Di ko motuo anang imong gisulti, uy, Bay Pacio, mitingsi si Gumer human siya sultihi ni Kadoy nga gisundan siya’g usa ka bampira.

“Bampira god tawon, wala na kana karon, uy...”

“Aw, naa ra nimo kun dili ka motuo, Bay Gumer, basta kay gisundan gyud kog babaye nga labihang tag-asa sa mga tango,” mikunot ang agtang ni Pacio nga mitaho sa iyang higala.

Suod silang managhigala ni Gumer kay parehas man sila’g gitrabahoan sa naulahi ug silingan pa gyud sila.

Nagtrabaho man god sila sa factory sa planggana. Init gyud hinuon ang ilang trabaho kay sila man ang motunaw sa tingga nga didto ra magbukal sa usa ka lawom nga lungag nga gituyo gyud paghimo para sa mga gipangtunaw nga tingga ug ang tinunaw nga tingga kab-on kini ug ibubo sa sa hulmahan sa planggana. Ug karon panggabii si Gumer ug si Pacio mao na say pang-adlaw.

“Kanang gisulti nimo, Bay Pacio, nahitabo na sa salida sa sine. Kadto bang salidang Dracula ug uban pang mga salidang ungo-ungo, pero sa tinuod gyud nga kinabuhi, walay bampira, uy...” Morag giagi lang og komedya ni Gumer ang pagpasabot niya ngadto sa suod nga higala.

“Basin og hubog ka ug kadtong giingon mong misunod nimo, GRO to...”

“Bampira lagi gyud, Bay. Mikaratil man gani kog dagan,” nangugat si Pacio.

Tuod sa pagpauli na ni Gumer ug samtang naglakaw siya subay sa mamingaw’ng dalan paingon sa ilang balay, may nabati siyang uwang sa iro. Nanlimbawot ang iyang balahibo busa midalidali siya’g lakaw ug iya nang gipaspasan ang iyang paglakaw nga morag sagol dagan na. Igo-igo gyung nahiabot siya sa ilang balay ingon sa mihunong ang uwang sa iro. Gisugat siya sa iyang asawa nga si Sabel. Mabalak-on kaayo ang hitsura niini. Unya iyang gipangutana kun unsay problema.

“Si Dodong taas kaayo ang hilanat, dad-on nato sa hospital,” ni Sabel pa. “Tana, ayaw na lang pag-ilis...”

Gidala nila sa hospital ang ilang anak. Diha sila moagi sa may agianan kilid sa menteryo kay sa luyo niini mao na man ang Emergency Hospital sa lungsod.

Samtang naglakaw sila ug si Sabel maoy nagkugos sa bata, may nanitsit. Milingi si Gumer. Ug didto sa may kilid sa nitso nga makita duol sa agianan may babaye nga nagbarog ug unya milakaw kini sunod kanila. Mihunong si Gumer. Gipaabot ang babaye. Sa duol na kini nakita gyud ni Gumer nga labihang tag-asa sa mga ngipon niini ug labaw pa ang mga bangkil.

Bampira! Gibati og kahadlok si Gumer apan kuyog niya ang iyang pamilya busa gikalitan dayon niya’g suntok ang nawong sa babaye. Nahagsa ang babaye sa yuta apan mibangon dayon, nakita ni Gumer nga nagdugo ang ilong sa babaye.

“He,he,he,he,he,he kamo ang sunod kong suyopan sa dugo, hehehehe!!”

“Sabel, lakaw lahos ngadto sa hospital kay makigkombati ko ining bampira!” ni Gumer pa.

Misirit paglakaw si Sabel nga dali rang nakasabot. Unya giibot ni Gumer ang iyang bronse nga punyal ug tinalinsang bagakay.

Sa pagdasmag sa bampira gisugat dayon niya kini og kusog nga duslak sa bronseng punyal ug talinis nga bagakay. Misinggit sa kasakit ang bampira ug kalit lang nahimong aso. Ug karon mituo na siya nga duna gyud diay bampira dinhi sa ilang dapit. Apan diin man kini gikan? Ug karon morag gibati na siya’g kahadlok. (Kataposan)