Sex slave

Gula 38

Sanglit bag-o pa ko sa trabaho, gusto kong masinati ang mga produkto nga among ibaligya. Gihiling nako ang mga stock aron kun unsay orderon didto sa tindahan, kadali ra kong makatultol niini. Gitiman-an gyud nakog maayo ang stock number sa matag produkto. Gusto kong ipakita ang maayo nakong performance sa trabaho.

“Hi...!”

Naigking ko pagkadungog sa tingog nga naggikan sa akong luyo samtang padayon kong nanghiling sa stock nga mga sapatos. Mihinay kog lingi ug maoy misugat sa akong panan-aw ang bayhon sa usa ka lalaki. Nagpahiyom kini kanako.

“Kumosta ang imong trabaho?” Nangutana siya. “Wa ka ba maglisod?”

“Medyo naglisod,” maoy akong tubag. “First day pa man god ron nako. Pero maanad ra ko niini sa kadugayan.”

“Ako si Leemar, taga Tambulilid, Ormoc City.”

“Ako sab si Bonita, taga Kananga.”

Ug naglamanohay mi. Nabatyagan ko ang kainit sa iyang palad dihang gipig-it niya ang akong kamot. Mora bag gikuryentehan ko.

“Nalipay sab ko nga duna diay koy kauban dinhi,” matud ko. “Laay kaayo dinhi kun ako rang usa. Mingaw.”

Kadali ra kaming nagkasuod si Leemar. Gani, daghan na siya’g natug-an nako bahin sa personal niyang kinabuhi. Minyo na diay siya ug may duha ka anak. Kamanghoran sa tulo ka managsuon. Nagpuyo siya sa Tambulilid uban sa iyang asawa, mga anak ug mga ginikanan. Sa akong bahin, wala gyud nako tug-ani si Leemar sa tinuod nga dili ko taga Kananga kondili taga Isabel.

Usa ka higayon niana, miduol nako si Leemar samtang nag-check ko sa  mga produkto nga ako nang na-dispatch ngadto sa tindahan.

“Puyde bang manihapon ta sa gawas inig-off nato?” Maoy iyang pagdapit.

Nakalitan ko sa iyang gisulti. -- Sumpayan pa