Ang anting-anting ni ingko Fredo

Basak, San Fernando, Cebu

Kinse anyos palang si Ingko Fredo adtong tungora nga nakaangkon siya og abilidad sa pakig-away. Ug hangtod karon sa iyang katiguwangan nagpabilin lang gihapon ang mao niyang abilidad nga anting-anting. Wala siya magdahom nga sa iyang kabatan-on maantigo na siyang makig sangka sa mga kaaway nga buot mopukan sa iyang pagkatawo. Nagsugod ang iyang abilidad sa dihang nakakita siya og lansang nga naglutaw sa tubig.

Nakatu-aw siya sa iyang kaugalingon. "Naa pa diay lansang nga molutaw sa tubig?" nakapangutana siya sa iyang kaugalingon.

Wala wad-a ni Fredo sa iyang panan-aw ang maong butang nga iyang nasaksihan. Bisan sa iyang kabatan-on aduna na siya'y maayong nahunahunaan bahin sa iyang nakita. Naka dungog na siya bahin sa anting-anting. Wala mag-usik si Fredo og mga gutlo iya kining gipunit gikan sa tin-aw nga tubig ug gidala pauli sa iyang pinuy-anan. Wala siya'y bisan usa nga iyang gisultian bahin sa iyang nakita.

Ingon nga tuyo sa kahigayonan sa dihang nag-ugmad siya sa gamay niyang uma, iyang nakita ang usa ka botelya nga may Santo Cristo ang sulod niini. Naka panghupaw siya og lawom unya mihangad sa langit. Gidala niya ang maong butang sa iyang pinuy-anan ug iya kining giipon sa lansang nga iya usab nga nakita sa tubig nga naglutaw.

Nianang pagka gabii wala siya mahikatulog dayon, nanumbalik sa iyang panumdoman ang iyang nasaksihan.

"Unsaon ko man ang maong butang? Kung mao kini ang gitawag nila og anting-anting unsaon ko man aron magamit ko kini ang maong abilidad."

Nagduwa-duwa sa panumduman ni Fredo ang mga kahibulungang panghitabo nga iyang nasaksihan. Milabay ang mga gutling sa oras nahikatulog kini.

"Fredo.....Fredo. ...pamati," may misampit sa iyang ngalan. "Pahinungdi og mga pag-ampo ang mga butang nga imong nakita. Gasa ko kini kanimo isip ganti sa imong kabuotan," nagkanayon ang maong tingog nga iyang nadungog.

Nahigmata siya, niliraw ang iyang mata sa palibot.

"Nagdamgo lang diay ko? Apan mora og tinuod ang tanan kong nadungog," ni kutib ang mga ngabil ni Fredo nga naghanduraw.

Gikuha ni Fredo ang botelya nga may sulod nga Santo Cristo nga nagdupa ug ingon man ang lansang. Iya kining gipahinungdan og pipila ka mga pag-ampo. Ingon sa nausab ang iyang pamati mora ba'g may inerhiya nga nituhop sa iyang kaugalingon. Nabatyagan niya ang talagsaong kaabtik ug  talagsaong kakusgan sa iyang kaugalingon. Naka pasalamat siya sa hilom sa nilalang nga naghatag ngadto kaniya sa maong gahom. Daghan ang nag-ingon nga dili basta-basta si Fredo tungod kay nindot ang kombinasyon sa iyang anting-anting nga iyang nahuptan.

Iya kining gigamit sa buhat nga matarong, wala siya magbuhat og dautan nga makadaot sa katawhan. Daghan na ang iyang giluwas gikan sa mga bangis nga kaaway. Gitawag na gud siya sa among dapit og "super hero si Ingko Fredo". Ug tungod sa iyang naangkong abilidad gikalipay kini sa mga lumolupyo sa among dapit. (Kataposan)