ANG kalag ni Norma

Si Nang Masing adunay duha ka anak nga puros babaye si Naring ug Norma. Sayong nailo sa amahan ang duha kay sayong mipanaw sa laing kalibutan ang ilang amahan gumikan sa sakit nga kanser.

Nagtinubo ang duha nga uhaw sa pagmahal sa usa ka amahan. Si Manang Masing lang ang nag-inusarang nagmatuto ug nagpadako sa duha niya ka anak. Ang magulang si Naring ug ang manghud si Norma. Dili gyud ikalimod nga adunay pinalabi si Nang Masing sa iyang duha ka anak. Kun duna gani magustuhan si Naring ilugon man kini ni Norma bisan gamay pa silang mga bata hangtod nga nagdalagita na sila. Sa dihang nagpangidaron na sila og 16-anyos, daghan nang mga lalake  ang magbirig-birig sa duha ka matahom ug maanyag nga bulak ni Nang Masing diin si Norma gyoy iyang pinalabi.

Usa ka lalaki ang nangayog katahuran. "Maayong gabii," matud niya.

O dong Esyot unsa may ato nimo nga gabii naman kang nahisuroy ning among panimalay."

"Nia lagi ko Nang mamisita una ko ni Naring nang," tubag ni Esyot nga matinahuron kaayo ang tunado sa iyang tingog.

Sa pagkadungog ni Norma siya maoy miatubang ni Esyot ug miingon nga tulog na si Naring bisan nagmata pa kini. Ug gitintal niya si Esyot sa pagdimdim sa iyang pagkababaye.

"Syot wala ka madani sa kung katahom."

Wala gilayon ka tubag si Esyot nagtutok ang iyang mga mata nga nagsud-ong sa lawas ni Norma nga nag-suot og nipis nga pangkatulog ug nihulma ang duha ka ugdo nga dughan niini.

Natintal gayud si Esyot ug naabtan kini ni Nang Masing nga nagtagay ang duha sa dugos sa himaya.

Ug sa pinugos nga paagi nagminyo sila si Esyot ug Norma ug nasakitan si Naring sa mga panghitabo kay sa hilom siya may pagmahal ni Esyot. Milangyaw si Naring sa halayo nga lugar ug nabalitaan niya nga naka-anak na si Norma ug Esyot usa batang babaye apan walay maayong tinagdanay ang ilang kaminyoon kay tagdugay man mouli si Esyot gikan sa iyang gitrabahoan.

Si Norma nagduda nga nagbinuang si Esyot sa ilang pagpuyo usa ka adlaw nakadawat og tawag si Naring nagagikan kang Norma ug nagpatabang sa ilang pagpuyo kay sa tinuoray lang si Naring ang gihigugma ni Esyot.

Didto sa trabahoan kalit lang midakyop sa iyang panan-aw ang panagway ni Norma nga daw adunay pagdumot kaniya.

Sa dayong uli ni Naring nakadawat siya og tawag sa iyang mama nga nagpahibawo nga patay na si Norma naghiwa kini sa iyang pulso. Wala maglangay si Naring niuli gilayon siya sa ilang dapit sa pag-abot nila sa ilang panimalay nagka-estoryahay gyud sila si Naring ug Esyot nga sa gihapon siya ang gimahal ni Esyot ug wala siyay gugma ni Norma.

Sa pagka-gabii nagmugna og katingalahang hitabo ang kalag ni Norma daw sama sa bangis nga hangin nga mihampak sa panimalay ug miugpad sa mga butang dungan sa paglanog sa tingog ni Norma.

"Patyon ko ikaw hahaha..." gibati og tumang kalisang si Naring ug ang iyang inahan.

Daghan na nga kahibulongang panghitabo sa panimalay nila ni Naring kanunay kining hasion sa kalag ni Norma nga nagkundenar. Nagkuha si Naring og pari aron pabinditihan ang ilang panimalay diin ang kalag ni Norma nagpabilin. Sa pagbindita na sa pari kalit lang misyagit ang tingog sa usa ka babaye nga naghinay-hinay og palayo sa dakong balay ni Nang Masing. (Kataposan)