University of the Visayas, Colon St. Cebu, City
Mikanaog si Princess sa gimaneho niyang Honda civic. Gipaliraw niya ang iyang mga mata sa palibot. Mao kini ang dapit nga iyang gitalikdan sa dugay nga panahon. Andam na ba siya sa pag-atubang sa tanan?
Gitangtang niya ang shades nga iyang gisul-ob ug mipaingon sa balay nga maoy hinungdan sa iyang pagbalik. Nag-doorbell siya. Wala madugay may migawas nga usa ka gwapang babaye. Sa iyang tan-aw katalirungan ra niya kini og edad.
"Unsay tuyo nato?" Mipahiyom kini kaniya. Giablihan niini ang gate. Nagduhaduha siya sa pagtubag.
"Ma, hapit na maluto ang cake nga atong gi-bake." Matud sa usa ka dalagita nga kalit nga mibutho sa ilang atubangan. Gisud-ong niya kini. Nanghalang ang iyang mga mata. Mitalikod siya ug nagdali nga misakay og balik sa iyang sakyanan.
"Kinsa to Ma? Nganong kalit man siyang milakaw?''
"Wala ko kaila niya anak. Siguro, nasayop lang to siya sa pagtultol sa saktong lugar nga angay niyang adtuon. Dili siguro kita ang tuyo ato.'' Gibalik niya og sirado ang gate.
"Siguro Ma. Mora man tong dili taga diri. Gwapa kaayo siya Ma. Parehas mi og dimples." Mipahiyom si Diane. Misulod sila og balik sa ilang balay.
Daw gipikas ang iyang kasingkasing sa tumang kasakit ug pagbasol pagkakita niya sa iyang anak. Nagbasol siya nganong iya kining gibiyaan ug gihiklin sa iy ang kinabuhi. Nagbasol siya sa tanan. Kung mahimo lang nga iyang ibalik ang kagahapon. Giumod niya ang iyang nawong sa unlan. Mihilak siya ug mihilak uban sa paghandom sa mga nangagi....
"Yes Carl, I'm pregnant but I won't marry you!" Isog niyang giatubang ang hinigugma.
"Please Princess bisan alang sa umaabot natong anak.'
"Sa imong anak Carl. Gikasilagan ko kining bata nga akong gisabak!"
"Ayaw pagsulti ana Princess. Walay sala ang bata."
"Siya ang miguba sa akong mga pangandoy, nakasabot ka!" Gisinghagan niya kini.
"Wala maguba ang imong mga pangandoy. Andam akong mangasawa nimo Princess. Mangatubang ako sa imong mga ginikanan." Mitutok kini kaniya.
"Ayaw kana buhata Carl kung gusto nimo nga mabuhi kining imong anak. Dili ko gustong mangasawa kanako kay wala ka kapasar sa standard sa among pamilya." Mitalikod siya ug iya kining gibiyaan.
Bisan sakit sa iyang kabubut-on, mitipon siya kang Carl. Dili siya kaako sa pagpakuha sa bata nga iyang gisabak. Gitago niya ang iyang pagmabdos sa iyang pamilya. Dili siya gusto nga ihiklin siya sa iyang pamilya kung mahibaw-an ang iyang kahimtang. Pagkahuman niya og panganak, milakaw siya nga wala mananghid kang Carl ug gibiyaan niya ang ilang anak sa kiliran niini. Ug pila lang ka bulan gikan sa maong panghitabo, misunod siya sa iyang mga ginikanan nga milarga sa Canada. Didto siya mipadayon sa iyang pagtuon og Medisina.
Ug karon, naangkon na niya sa hingpit ang iyang mga gipangandoy apan wala siya magmalipayon sa tibuok niyang kinabuhi. Padayong mitulisok sa iyang dughan ang tumang kahaw-ang.
Nag-doorbell siya. Migawas ang usa ka lalaki ug pamilyar kaayo niya ang bayhon niini bisan dugay sila nga wa magkakita niini.
"Princess?!" Daw wala kini makatuo sa nakita.
"Yes Carl, it's me." Mipahiyom siya.
"Nganong mibalik ka?" Isog na kini nga miatubang kaniya.
"Mibalik ako para kuhaon ang angay nga naa sa ako karon.''
"Wala kay angay nga angkunon Princess kay bisan kanus-a wala mo siya giangkon!"
"Kuhaon na nako ang akong anak Carl, naa ba siya sa sulod? Maluoy ka Carl, ibalik mo siya kanako." Mihilak siya.
"Wala koy angay ibalik nimo. Ikaw ang mibiya kanamo Princess. Mora kog nawad-an sa pangisip sa imong pagbiya. Gibiyaan mo ang atong anak sa tumang kasayon! Nagkinahanglan siya kanimo niadtong mga panahona apan imo siyang gisalikway."
"Nagbasol nako sa tanan Carl. Please, maluoy ka ibalik mo na kanako ang atong anak." Gigunitan niya ang bukton niini.
"Magpasalamat ka kay mieskuyla si Diane, kay kung naa pa siya karon, dili ko gusto nga makit-an ka niya. Dili ko gusto nga makita niya ang walay balatian niyang inahan!" Gibira niini ang bukton nga iyang gigunitan.
"Carl...."
"Nagbasol ko nganong ikaw pa ang akong gihigugma kaniadto. Apan wala ko magbasol nga miabot si Diane sa akong kinabuhi kay siya ang katumanan sa akong mga pangandoy. Lakaw na Princess, and let go. Malipayon na kami sa among kinabuhi." Giablihan niini ang gate.
"I'm so sorry Carl. Dili nako magsamok-samok ninyo. Higugmaa og maayo ang atong anak. Sakto ka, dili na siya angay makaila nako. Salamat sa tanan." Midagayday sa iyang kaapingan ang mga lusok sa luha. Mitalikod siya ug mipahilayo sa hingpit sa kinabuhi sa tawo nga maoy naghatag kaniya og kadasig aron matuman ang iyang mga gipangandoy apan napakyas siya sa pag-angkon sa maong kalipay ... si Diane. (Kataposan)