Tungod sa kahubog

Jasaan, Misamis Oriental

Adlaw'ng Domingo, misulod si Cardo sa disko bar para paglingawlingaw palabay sa hilabihang kahago tibuok semana sa iyang trabaho sa buhatan nga iyang gitrabahoan. Kauban niya ang usa ka higala nga iyang katabang sa opisina.

"Bay, mag-order kitag pulutan. Gigutom ako tungod sa kabug-at sa mga butang ako gikarga," pulong ni Cardo dungan sa pag-inom sa usa ka shot nga tanduay. "Unya, human kita makainom, mopauli dayon kita kay nagpaabot ra ba ang akong love sa balay."

"Hoy! Klaro baya, Bay, ha," matud sa higala ni Cardo. "Tingali bayag mahitabo na usab kadtong nahitabo sa usa nga tungod sa kahubog, nalimot kana kun asa ka mopauli."

"Diha uy! Komedya ra kadtong ako. Dili na kadto mahitabo, Bay."

Kini si Cardo, bisan kun kapin na sa kuwarenta anyos ang edad, haskang pagka hilig pa gayod sa chick nga daw dili matagbaw sa iyang asawa. Guwapa ang iyang asawa, kun makahigayon, moadto gayod sa laing sabakan. Hinuon, dako ang iyang suweldo nga madawat matag bulan. Gawas sa sideline, duna pa silay gipatantohan nga kuwarta para magamit sa ubang katuyoan. Nagplano man god siya ug iyang asawa nga mopalit og kotse para magamit sa anak sa pag-eskuwela.

Alas diyes na ang takna sa gabii. Medyo nalango si Cardo. Ang babaye nga nahimong ka-table, nagpauraray na kini sa sabakan ni Cardo. Samtang ang kauban, nagkalingaw kinig pislit sa dapit sa dughan sa babaye.

Hangtod nga mihagad si Cardo nga sa buntag na lang sila mamauli kay matud pa niini, lawom na ang kagabhion. Pero, ang tinuod, mitukar ang pagka dukirok ni Cardo. Ug tungod na sa pagkalango, gihagad ni Cardo ang ka-table nga babaye mo-check in sila sa kuwarto.

"Yatis, Bay. Segurado gayod nga masuko ang akong asawa kun dili ako makapauli karong gabii," pulong sa kauban ni Cardo. "Nia ra ba kining tambal nga iyang gipapalit."

"Sagdi kana, Bay," pulong ni Cardo. "Ang importante nga imong mahapuhap ang lips sa imong ka partner. Total gabii na usab ug wala nay sakyanan padulong sa ato. Ayaw kahadlok sa imong asawa. Siya ba diay ang nagtrabaho."

Mao kadto nga nagbuntag ang duha sa lawak niadtong disco house diin sila mag-inom. Tagsa-tagsa sila sa babaye ug ang mibayad si Cardo kay siya man gayod ang namugos. Apan, tungod lagi sa hilabihan kahubog ni Cardo, nakatulog siya samtang ang iyang kauban, kay dili man kaayo hubog, medyo nakasiyapol sa sabakan sa iyang ka partner.

Naglagot ang kapartner ni Cardo kay wala man kiniy nahimo. Unsaon pagka himo nga hilabihan man kini kahubog. Halos, magbuntag kini sa paghinagok nga tungod sa hagok, walay nahimo ang partner niyang babaye.

"Animal ba kining tawhana, nagsige man lang paghagok," pulong sa babaye nga naglagot. Unsaon ko na lang niini nga wala na ra bay gatas kadtong akong anak."

Sa hilabihang kalagot kang Cardo, nakahunahuna na lang hinuon kini sa daotan. Gikuot niini ang bulsa ni Cardo aron susihon kun duna ba kiniy kuwarta. Pagkuha niini sa pitaka, nakita niini ang daghan kuwarta. Human makuha ang kuwarta, gilayon misibat ang babaye nga walay gibilin sa kuwarta ni Cardo. Busa, pagka buntag samtang gilugod niya ang iyang mga mata, diha pa siya nahinumdom sa iyang pitaka nga iyang gibutang sa karsones sa wala pa siya matulog. Ug pagsusi niya, wala na didto ang iyang pitaka lakip pa gayod kadtong gipamalit niya para pagkaon sa ilang anak.

Diha pa dayon siya makaamgo nga diay gikuha sa babaye ang tanan niyang kuwarta. Apan, unsaon na lang nga wala man siya masayod kinsa kadtong babayhana nga iyang gika-table. Gipukaw ni Cardo ang iyang kauban ug iyang gisultihan nga gikuotan siya sa babaye nga iyang ka-table.

"Siyaro naman, Bay, nga wala ka gayod mahigmata," pulong sa higala ni Cardo. "Nan, unsaon na lang karon?"

"Buwisit kadtong babayhana. Animal! Pati ang tanan sa akong mga butang, gihurot," pulong ni Cardo.

Mipauli si Cardo nga walay dala gawas sa karsones. Maayo nalang nga wala iapil ang iyang karsones segurado gayod nga mopauli siya nga hubo. Unsa man kaha ang iyang buhaton karon nga wala man siya dala gikan sa trabaho?

Nagbasol si Cardo sa nahitabo. Ang iyang gibuhat mao nga gihangyo niya ang iyang kauban nga tabangan siya pag-esplikar basin pinaagi niini motuo ang iyang asawa.

"Tinuod bitaw, Nang," pulong sa kauban ni Cardo. "Mao bitaw nga wala kami makauli kay didto man kami sa polis basin makita ang nagkuot sa pitaka. Apan, wala gayod madakpi ang nagkuot."

Buotan ang asawa ni Cardo ug walay langas nga mituo kini sa gisulti sa higala ni Cardo.

"Daan pa lagi ako nga dil gayod maayo nga dugay kang mopauli," pulong sa asawa. "Sagdi! Maayo na lang nga wala ka patya."

Mituo ang asawa ni Cardo. Ug human niini, nagkinidhatay siya timaan nga luwas na si Cardo sa pagduda sa iyang asawa. (Kataposan)