Tahuron nato sila

Mahilig mokaon sa inilang restaurant si Nancy uban sa iyang mga kahigalaan nga gusto usab mokaon sa gawas labi na kun adlaw nga tingsweldo.

 "Nahibawo ba ka Chai nga may bag-ong kan-anan nga giablihan sa may Osmeña Boulevard? Lamian kuno ang ilang mga linuto matud pa sa mga nakasuway na didto. Sweldo man ta rong hapon, adto ta manihapon?" ni Nancy pa ngadto sa kauban niya sa opisina.

"Bitaw no? Sige Nans, uyon ko. Di ba kaayo na layo gikan dinhi sa atong gitrabahoan?" sukot ni Chai.

"Dili uy. Walking distance ra gikan dinhi sa opisina."

Tuod man, human madawat ang ilang suhol sud sa usa ka kinsena didto manihapon ang managhigala sa gihisgutang kan-anan.

"Dugaya sad sa akong giorder nga mineral water, uy. Makalagot sad ning mga waiter diri da," reklamo ni Nancy ngadto sa iyang kauban."

"Mam, sorry, kaayo kay wa na diay mi mineral water. Tap water na lang kun gusto ka." Esplikar sa tigsilbi ngadto kang Nancy sa dihang mibalik na kini.

"Porbida baya nimo, uy! Gayaya man lang ka. Sige, tap water na lang og dalia kay uga na kaayo ning akong tutonlan!" singhag ni Nancy ngadto sa waiter nga medyo nasuko sab kaha nauwaw sa kasaba sa dalaga.

 Wa madugay miabot ang waiter ug gibutang sa lamesa ang usa ka basong bugnaw nga tubig. Wa dayon kini molakaw ug gitan-aw si Nancy nga mihurot pag-inom sa usa ka basong tubig gumikan sa kauhaw.

"Isoga sab nimo Nans oy. Mangasaba man dayon kag waiter. Maayo gani kay mipahiyom lang tong tigsilbi samtang nagtan-aw nimong nag-inom sa da niyang tubig." Nakatuaw si Chai ngadto kang Nancy sa dihang milakaw na ang waiter.

"A da, mao nay angay sa mga waiter nga dugayan moserbe kasab-an aron magdali."

Milabay ang mga adlaw, usa ka hapon niana, day off ni Nancy ug may gikasabot siyang higala nga mag-abot sila sa kan-anan diin didto may gikasab-an siyang waiter. Samtang naglingkod siya nga nagbasa og pamantalaan, duha ka waiters ang naghinabi di layo sa iyang nahimutangan sa iyang luyong bahin.

"Estrikta kaayo nang kustomer sa table 4, Parts. Nalangan lang kog diyutay pagserbe sa iyang softdrink nangasaba man dayon? Nauwaw ko Parts. A, sa akong kalagot akong gibaslan."

"Mao ba? Unsa man diay imong gibuhat, Parts?"

"Ang mga sobrang softdrinks sa ubang customer maoy akong giserbe niya. Maayo pa kaayong suyop sa kanahang daku."

"Pareho diay sad sa akong eksperiyensa, niadtong miaging semana. Estrikta sab kaayong bayhana. Gikasab-an ko niya kay nadugay og hatud ang tap water kay nahutdan na man og mineral water. Uwaw sab kaayo ko mao tong ako sab gibaslan."

"Unsa may imong gibuhat, Parts?"

"Akong gisawsaw ang akong kargada sa bugnaw'ng tubig sud sa baso una pa nako iserbe niadtong bayhana nga estrikta. Haskang bugnawa lagi pero ako lang giagwanta bisag miku nang akoa."

Nagdungan dayon og pangatawa ang duha ka waiters. Si Nancy nga nagpaminaw wa kaagwanta ug gilingi niya ang duruha sa iyang luyo. Labihan niyang lagota sa dihang ang maong waiter mao ang iyang gikasab-an niadtong nanihapon siya uban sa iyang kauban sa opisina.

Paglikay sa kasamok nagpugong lang si Nancy nga daling migawas sa maong kan-anan. Samtang naglakaw pahilayo sa maong dapit, nakahukom siyang mag-usab na sa iyang pagkaestrikta ug tahuron ang isigkatawo bisan unsa siya kagamay sa iyang panan-aw. (Kataposan)