Sex slave

Gula 14

Pagkaugma, Domingo sa buntag, sayo kong mibangon ug naligo. Human makapamahaw, mibiya ko sa among gipuy-an aron mosimba. Nagpahatod kog putpot paingon sa simbahan. Namasin ko nga lamdagan sa Espiritu Santo ang akong hunahuna ug giyahan sa angay kong buhaton aron makakat-on ko pagdawat sa trahedyang midangat sa akong kinabuhi.

Wala pa magsugod ang misa sa akong pagsulod sa simbahan. Daghan pang bakanteng lingkoranan. Sa ikalimang talay sa mga lingkoranan dapit sa atubangan sa altar mipahimutang ko. Wala madugay, nagsugod ang santos nga misa.

Human sa misa, mikuyog ko sa duot sa katawhan nga nanggawas sa simbahan. Gitan-aw ko ang akong relo. Alas nuybe pa sa buntag. Dili pa ko gustong mopauli sa amo. Bation ko lang ang kalaay didto ug hayan maghunahuna na sab bahin sa nahitabo nako. Gusto kong lingawon ang akong kaugalingon.

Nagpahatod kog putpot paingon sa merkado publiko sa Isabel. Sa miaging mga adlaw, nasaksihan ko ang kaalegre sa maong dapit. Apan karon ingon sa wala makapadani nako ang kadasig sa katawhan nga akong nakita sa merkado. Mao gayoy mipasulabi sa akong galamhan ang kasubo gumikan sa nahitabo nako.

Kay wala koy nakita nga makalingaw nako sa merkado, misantop sa akong hunahuna nga mopauli na lang. Manghipos na lang hinuon ko sa akong mga gamit kay human sa paniudto, molarga na ko paingon sa Tacloban diin atua ako mag-eskuyla sa kolehiyo.

Motawag na unta kog putpot sa dihang may nabati kong tingog nga nagsangpit sa akong ngalan. Sa akong paglingi, maoy misugat sa akong panan-aw ang bayhon ni Tiyo Camilo nga naglakaw paingon sa akong nahimutangan. Buot kong molikay apan nahadlok kong masuko siya nako. Gipaabot ko na lang nga mahiduol siya sa akong gibarogan.

“Unsay imong tuyo?” May kagahi ang akong tingog.

“Wa ba magduda ang imong mga ginikanan nga may nahitabo nimo?” Gisumbalik ko niya’g pangutana.

“Ayaw kabalaka. Wa ko ikaw ibulgar ngadto nila.”

“Maayo hinuon kun mao kana. Tuod, gusto kong moadto ka sa akong gipuy-an karong hapon.” -- Sumpayan pa