Gula 228
Naglibog ko ni Rodney. Wala ko makasabot kun nganong iya kong gidala sa Sacres, Bakilid sa dakbayan sa Mandaue nga wala man diay siya masuheto sa maong lugar.
“Nganong nia man ko nimo dad-a dinhi?” Gipangutana ko siya.
“Tungod kay wala ko masayod kun asa ta paingon,” niya pa. “Wala koy planong moanhi dinhi. Pero kini rang dapita ang akong nahinumdoman kaganina sa dayon natong sakay og taxi. Maong kini ang akong gisitar sa driver.”
“Nan, asa man ta paingon ron?”
“Manglakaw ta paingon sa unahan. Maghunahuna pa ko kun unsay angay tang buhaton karon nga nia na ta sa Sacres.”
Nanglakaw dayon mi. Si Rodney gihapon ang nagbitbit sa duha ka bag nga gisudlan sa among mga sapot. Nagsunod ko niya. Matag karon ug unya molingi siya aron pagsuta kun naa pa ba ko sa iyang luyo.
Paghitungod namo sa usa ka refreshment parlor, mihunong mi. Unya misulod. Mi-order si Rodney og snacks alang namong duha. Nangisnak una mi.
“Mangita tag balay nga kaabangan dinhi,” matud ni Rodney samtang nangaon mi.
“Mag-agad ra ko kun unsay imong plano,” matud ko.
Human mi makapangisnak, nanggawas mi sa refreshment parlor ug nagpadayon paglakaw nga walay tumong. Gisulod namo ang gagmay’ng mga eskinita ug nagpangutana sa mga tawo kun duna bay balay nga paabangan sa maong dapit.
“Entiro balay ang inyong abangan?” Pangutana sa lagas nga among gikahinabi.
“Dili, Noy,” si Rodney ang mitubag. “Kuwarto lang ang among abangan.”
“Naa sa ilang Bungkoy,” matud sa lagas.
Ug gitug-anan mi sa lagas nga lalaki kun hain ang balay ni Bungkoy. Giadto dayon namo kini. Tuod man, gikaatubang dayon namo si Bungkoy. Gipadayag dayon ni Rodney ang among tuyo kaniya. -- Sumpayan pa