Wakwak naghikog human mangharana

Way gusto si Teresita kang Pael kay dili niya kini type. Ang iyang nagustohan mao si Richard, ang anak ulitawo ni Doktor Perez nga dunay klinika sa lungsod. Guwapo kini si Richard ug maayo kaayong mokanta.

Gani, kadaghan na buhata ni Teresita nga magpaduding siya kang Richard apan ingon sa way pagtan-aw kaniya ang ulitawo. Siya gyud gani ang mangimbitar sa ulitawo ug kay siya may mangimbitar natural nga siya ang mogasto sa higayon nga manulod sila’g mga fast foods restaurant. Usa man god siya ka registered nurse ug nagtrabaho siya sa usa ka inilang hospital dinhi sa dakbayan. Nagpaabot na lang siya nga mopasumbingay si Richard kaniya apan hangtod rong mga adlawa wala pa gyud kini mopakita’g lihok nga angay’ng kadudahan.

Ug karon naglagot siya kay si Pael na man hinuon ang mipadayag sa gugma niini kaniya. Atang-atangan pa siya inig kanaog niya gikan sa gisakyan niyang bus. Makalagot! misinta ang kahiladman ni Teresita. Dili gyud niya matulon si Pael kay morag way kaligo. Langsa og baho kanang moduol kini kaniya ug naa pay buhok nga way panudlay ug sigahon pa gyud nga mga mata.

“Wa man koy gusto nimo, Pael, unya magsige kag atang-atang nako. Sus, kaligo una didto sa inyo, uy,” wala niya matuyo nga nainsulto niya ang ulitawo. Unya, iyang nakita nga morag mitulo ang mga luha niini.

“Mahal ug gihigugma tika, Ter,” mubong pahayag ni Pael.

“Saba diha, uy, nagdala ka lag kabati sa akong adlaw ron da,” singhag ni Teresita dayong biya sa ulitawo kinsa morag kandilang giugbok nga wala maglihok.

Pagka gabii, nagubot ang mga silingan nilang Teresita kay halos tanan nilang mga binuhing baboy, kanding, baka ug mga manok gipangkuhaag mga atay, tinai ug batikolon.

“Wa nay laing naghimo ini,” nagkanayon si Sixto, ang bagis sa eskina. “Kanang inahan ug amahan ni Pael kay mga ungo na sila, hagbay ra nang gidungog, kun ako lay makasakop ana nila hutdon ko sila’g patay...”

Pagka gabii nianang pagka ingon ugma, nakurat si Teresita kay may nangharana kaniya. Yabag ra ba kaayo’g tingog ug naglagot siya kay sa iyang pagpanambo maoy iyang nakita si Pael nga nagpadayon sa pag-awit dinuyogan sa bagol niyang gitara.

“Buwisitttt!! gisinggitan ni Teresita si Pael ug dayong sira sa bentana nga pinabundak. Unya, nahilom ang pagkanta ni Pael. Maoy mipuli ang langgis kaayong tingog sa wakwak nga nagkanayon, “Wakkkkkkkk! Wakkkk! Wakkkkk! Wakkkkkkk! Wakkkkkk!!”ug nagsige’g bahisbahis tungod sa balay nila ni Teresita. Ug hangtod na gani nianang pagka tungang gabii nagsige lang gihapon ang tingog sa wakwak.

Pagka buntag sayo nagubot na usab ang mga silingan kay mao may ilang nakita ang usa ka tawo nga dunay pako ug taas ug kalkag ang mga buhok nga nagbitay sa may sanga sa dakong punoan sa Kolo ug nagdiwal pa gani ang taas kaayong dila niini

“Uy, Wakwak kana! Ug naghikog siya sa punoan sa Kolo!” may misinggit

“Si...si Pael kana, tan-awa ang nawong, siya kana. Wakwak gyud diay kana sila!” milanog ang tingog sa usa ka tanod. -- Kataposan