Ang Babaye sa Bentana

(Gula 45)

Si Cyrus gidali pagdala ni Melissa Viloron alyas Cheska sa labing duol nga hospital. Naulian na si Cyrus sa panimuot pag-abot nila sa tambalanan. Human siya mahiling sa doktor, giresitahan siya’g valium. Wala na lang siya i-confine sa hospital kay naulian na man siya. Maayo na ang iyang pamatyag sa lawas niya.

Wala na mahibulong si Cyrus sa nahitabo niya. Ang paghuot sa iyang dughan ug pagkalipong kaganina maoy timailhan nga nagkagrabe na ang HIV infection nga iyang nahiagoman. Sa iyang nabasahan sa usa ka libro, usa sa mamahimong hinungdan sa kamatayon sa tawo nga may HIV disease mao ang HIV-associated cancer ug heart disease. Panahon na aron mobalik siya sa Ginoo. Ingon man si Cheska.

Milabay ang siyam ka bulan. Sila si Cyrus ug Cheska hilom nga nangadto sa kaulohan. Miadto sila sa usa ka probinsiya nga maoy kasagarang dangpan sa mga artista sa puting tabil nga gustong magpa-secret marriage. Nagpakasal sila si Cyrus ug Cheska aron pagbugkos sa tinud-anay nilang paghinigugmaay.

Human sa ilang kasal, mibalik sila sa Sugbu. Apan gikontrolar na nila ang ilang kaugalingon. Gilikayan na nila ang unsafe sexual practice. Gusto silang makatabang pagpugong sa tulin nga pagkaylap sa sakit nga AIDS.

Gihukman nila ni Cyrus ug Cheska nga dili na gyud mogamit sa matuod nilang mga ngalan aron pagtabon sa dungog sa ilang tagsatagsa ka pamilya. Si Cyrus hingpit nang migamit sa iyang alyas nga Warner Rasalas. Si Cheska sab hingpit nang misalindot sa matuod niyang ngalan nga mao si Melissa Viloron.

Usa ka adlaw niana, nagpa-interview sila sa taga media. Atubangan sa press people, ilang giangkon nga nataptan sila sa HIV virus. Miapil usab sila sa mga kalihokan nga may kalabotan sa kampanya batok AIDS. Gusto silang makatabang pagsabwag og impormasyon ngadto sa katawhan aron sila makabantay sa makalilisang nga sakit ug makahatag og inspirasyon ngadto sa sama nila nga gitakboyan na sa maong sakit aron dili maguol pag-ayo luyo sa maong miserableng kamatuoran.

Malipayon sila si Cyrus Ampolis alyas Warner Rasalas ug Melissa Viloron alyas Cheska Bagseco sa ilang gibuhat. Nagminahalay sila pag-ayo. – Kataposan