Ngiob ang gabii. Walay buwan. Sa hilit nga dapit sa lungsod sa San Bartolome, sa ilalom sa kakahoyan nga nag-umbaw sa dalan probinsiyal, lima ka armadong mga tawo ang naghapa. Andam ang kaugalingon sa bisan unsay mahitabo samtang sa ilang mga kamot gikuptan ang tag-as nga kalibre sa mga armas.
"Nia na sila," matud ni Bogs nga maoy pangulo sa pundok. Nadungog nila ang tingog sa usa ka sakyanan ug ang siga niini nga nagkaduol sa ilang nahimutangan.
"Oo, Boss." Mitingsi si Gusting. "Impas sila karon."
Wala magtingog ang laing tulo ka kauban nga sila si Temiong, Ruben ug Carding nga nangandam usab sa ilang kaugalingon.
Dihang nahiduol na gayod sa ilang nahimutangan ang maong sakyanan nga usa ka Crosswind...
"Tiraaaaa!" Milanog ang tingog ni Bogs.
"Prakkk!
Ratattttt!
Daw gisangag sa mga buto sa pusil ang maong dapit. Taudtaod gayod. Unya kahilom.
Unya pagkataudtaod milanog ang bahakhak ni Bogs.
"Ato na ang negosyo! Ato na!"
"Ikaw na, Boss, ang ilhon namong pangulo sa sindikato sa ilegal nga droga. Ato na usab ang shabu laboratory." Mikatawa usab og kusog si Gusting.
Silang lima sakop sa sindikato sa gidiling droga. Apan gusto nila nga sila gayod ang modumala sa maong negosyo. Maong ilang giambusan ang ilang mastermind sa maong negosyo.
Ug karon, patay na ang ilang mastermind. Ug si Bogs isip maoy ikaduhang pangulo sa sindikato, siya na ang ilhong labaw nga pangulo sa organisasyon.
"Tana, manibat na kita dinhi. Pasagdan nato ang mga polis nga mohipos sa patay'ng lawas sa atong mastermind ug sa iyang mga bodyguard," matud ni Bogs nga nagdaling mipaingon sa giparkingan sa iyang kotse. Misunod kaniya ang upat niya ka mga sinaligan.
Malipayon kaayo si Bogs samtang nagpadagan sa iyang kotse. Mosamot ang iyang kaadunahan sa higayon nga siya na ang modumala sa ilang negosyo sa gidiling droga.
"Unsay sunod nimong plano, Boss?" matud ni Gusting.
"Unsa pa? Magdato gyod. Ug mabulahan sab kamo." Mingisi si Bogs.
Unya, kalit nga gipahunong ni Bogs ang kotse. Nahibulong ang iyang mga sinaligan. Diha sila sa usa ka awaaw nga dapit sa lungsod.
"N-ngano, Boss?" ni Gusting.
Kalit nga giablihan ni Bogs ang pultahan sa kotse. Misinggit siya. "Ambak mo! Ambusan ta! May mga polis sa unahan!" Apan wala pa gani siya makagawas sa kotse, mipaka na ang mga buto sa mga armas sa palibot.
Maorag impiyerno ang maong lugar. Ang kangitngit sa kagabhion gisiak sa kalayo sa nanuasik nga mga bala.
Nahunong ang mga buto. Sa sulod sa kotse, naglunang sa dugo si Bogs ug ang upat niya ka mga sinaligan. Milampos man tuod sila sa pag-ambush sa ilang mastermind sa sindikato sa gidiling drogas, apan wala sila makaikyas dihang giambusan usab sila sa mga tinugyanan sa balaod nga dugay nang naniid kanila. (Kataposan)