Dugos ni Eva

Nakareyalisar ko nga sa akong kahimtang karon, kinahanglang mokapyot ko bisan sa tumoy sa kutsilyo. Wala na koy laing kadangpan. Basin hulog sa langit si Rodney alang nako. Pero kun may daotan man siyang laraw alang nako, mahibaw-an ko ra kana kun mokuyog na ko niya. Andamon ko na lang ang akong kaugalingon sa bisan unsa man nga posibleng mahitabo. Wala pa gyod mapapas sa akong hunahuna ang katahap nga tingalig manimalos si Rodney kanako tungod kay gipatay sa akong amahan ang iyang amahan nga nahimong kabit sa akong inahan.

Hinuon, wala makighisgot si Rodney kanako bahin sa nahitabo sa among mga ginikanan. Nakasabot ko nga pulos lang bahin namong duha ang gusto niyang among hisgotan. Mao nga for the mean time, dawaton ko una ang iyang tanyag. Ingon niini man gyod ang kinabuhi sa tawo. Mapugos man gyod tag kapyot sa tumoy sa kutsilyo kun hapit na malumos. Mamahala na lang ko. Ang importante nga duna koy kadangpan dinhi sa siyudad human sa akong paglayas gikan sa balay sa akong agalon nga buot molugos kanako. Basin diay kun tininuod ang pagtabang ni Rodney nako.

"Mosugot ko sa imong gisugyot, Rod," giingnan ko siya. "Mokuyog ko nimo ngadto sa imong gipuy-an sa Inayawan. Pero dili kaha ta maikog sa imong iyaan?"

"Akoy bahala, Eva," ni Rodney pa. "Ayaw nag hasola ang imong hunahuna mahitungod niana."

Human sa among pangaon, nanggawas kami sa fastfood outlet. Mipara dayon si Rodney og taxi. Nanakay mi og nagpahatod ngadto sa Inayawan.

"Dugay ka na ba dinhi sa Cebu?" gipangutana ko si Rodney samtang nagdagan ang taxi nga among gisakyan subay sa C. Padilla St.

"Kapin nas usa ka bulan," maoy iyang tubag. "Nabalaka ko pag-ayo dihang dili ko na ikaw makontak. Hangtod nga mihukom na lang ko pag-abandonar sa akong pagtuon aron pangitaon ka. Namasin ko nga makaplagan ko ikaw dinhi sa Cebu maong mianhi ko. Salamat nga mibulig nako ang Kahitas-an ug nakit-an ko ra gyod ikaw." (Sumpayan pa)