Gula 39
Gipasagdan lang ni Cyrus ang pagbakho ni Melissa Viloron alyas Cheska. Wala siya mohimo’g attempt aron hupayon ang gibati niini.
“Nganong gipatuo man ko nimo nga mianhi ka sa Sugbu aron paglikay sa lalaki nga gusto sa imong mga ginikanan nga ibuya kanimo?” Gipangutana ni Cyrus si Cheska dihang inanay nang milurang ang paghilak niini.
“Tungod kay gusto nakong makuha ang imong simpatiya,” tubag ni Cheska. “Dili sayon ang akong pagkabutang. Gimingaw ko sa akong mga ginikanan nga nalayo nako. May mga tinugyanan sa balaod pa gyud nga nagpangita nako. Bisan nag-usab ko’g panagway apan wala gihapon ko mokompiyansa. Dili ko mahimutang. Labaw sa tanan, gihasol ko sa akong konsensiya tungod sa kamatayon ni Wayne.”
“Ug gusto ko nimong himuon nga scapegoat?”
“Dili kana ang saktong termino. Gusto lang kong may kapahungawan sa kabug-at sa akong dughan. Gusto ko’g tawo nga mahimo kong kaunong ug makasabot sa akong kahimtang. Ug ikaw ang nahunahunaan kong himuon nga someone to lean on to ease my pain kay gaan kaayo ang akong pagbati nganha nimo.”
Wala motingog si Cyrus. Igo lang niyang gitutokan si Cheska.
“Ikaw,” ni Cheska pa. “Tinuod ba sab ang imong gisulti nako nga gibiyaan ka og hinigugma? Nganong nagtakoban ka man sab? Aduna ka bay gustong likayan?”
“Ikaw ang hinungdan sa akong pagtakoban,” tul-id nga tubag ni Cyrus.
“Unsay buot mong ipasabot?”
“Mianhi ko sa Sugbu aron pagpangita kang Melissa Viloron aron panimaslan. Nagtakoban ko nga si Warner Rasalas aron dili makaila si Melissa nako. Dihang nasayran ko nga ikaw diay si Melissa, nakahukom kong patuohon ka nga gikan ko sa usa ka miserableng pagpakigrelasyon sa usa ka babaye aron makuha ko ang imong simpatiya ug maangkon ko sa hinanali ang imong gugma.”
“Gihigugma ko ikaw sa tinud-anay maong gidawat ko ang imong gugma.”
“Kasilag ang hinungdan kun nganong gusto kong maangkon ang imong pagsalig ug gugma.” -- Sumpayan pa