Dugos Ni Eva

Gula 199

Gusto kong hangyoon si Nang Badang nga dili lang una mobakasyon ngadto sa Negros aron may kauban ko sa servant’s quarter. Pero kun mohangyo ko niya, tingalig mahibulong siya nako. Tingalig makasabot siya nga duna koy gikabalak-an ug gikahadlokan. Wala na lang nako ihinayon ang diha sa akong hunahuna.

“Kanus-a ka man mogikan, Nang?” Gipangutana ko ang lagas.

“Nakapananghid na man ko ni Sir Vidoya,” ni Nang Badang pa. “Ugma sa buntag ko molarga. Sa Toledo ko moagi.”

“Ayaw baya pagdugay didto sa Negros, Nang, ha.”

“Dili lagi, Day. Usa ka semana ray gihatag ni Sir nga bakasyon nako. Gusto lang kong moduaw sa among lugar kay tulo ka tuig na kong wa makabakasyon.”

Tuod man, nianang pagkaugma nahinayon gayod ang paglarga ni Nang Badang paingon sa Negros. Gidoble ko ang akong kakugi kay ako na man lang usa ang naglihok sa balay. Ako na lay naghikutar sa mga buluhaton sa panimalay sa mga Vidoya. Hinuon, naanad na ko sa mga buluhaton sa balay maong wala na ko maglisod.

Nianang pagkagabii, human sa tanang mga bulohaton sa balay nga akong giatiman, misulod ko sa akong kuwarto sa servant’s quarter. Gibati ko ang kakapoy ug gusto na kong makapahuway. Gihukas nako ang sinina nga akong gisul-ob. Mihigda ko sa lantay nga bra ug panty lang ang nahibilin sa lawas. Gibati ko ang tumang kahilwas ug kahayahay sa kaugalingon sa maong kahimtang.

Hapit na ko makatulog dihang may nanuktok sa pultahan sa akong lawak. Napugwat ko. Gidali nakog pangita ang akong sinina ug gisul-ob kini pagbalik. Mibangon ko aron pagsusi kun kinsa ang atua sa gawas nga nagsige’g panuktok.

Pag-abli nako sa pultahan, maoy akong nakita ang bayhon ni Paul. Sa tan-aw nako sa iyang nawong, nakamatikod ko nga morag gisapot siya.

“Di ba lang ko nimo pasudlon?” Mitungas ang iyang tingog. -- Sumpayan pa