Ungo miapil sa Christmas party

Pasko na gyud sa daghan nang makita nga mga dayandayan sa Pasko sama pananglit sa parol, mga hulagway ni Santa Claus, mga naggilakgilak nga siga sa series light ug uban pa.

Sa nakita ni Todyong ingon sa gihilap ang iyang kasingkasing sa kaluoy nga nagtan-aw sa usa ka barongbarong nga nahimutang duol sa usa ka estero.

Iyang naagian kini dihang nangabat siya kagabii ug dinhi siya molabay. Sa iyang paniid morag wala ang mga ginikanan niining mga bataa kay nanagtungko na man lang nga way mga kaon.

Ning tungora nakahukom si Todyong nga hatagan niyag pinaskohan ang mga bata. Dato siya nga pagka ungo ug mansion ang iyang balay. Gikan man god siya sa Inglatera ug didto siya matakdi sa iyang pagka ungo. Pero, alang kaniya naglagot siya ning maong matanga sa sakit nga motukar lang inig takdol sa buwan ug kun mahimo lang kay siya na man usa ang nagpuyo sa ilang mansion gusto niyang imbitahon ang mga bata sa ilang balay ug maghimo siya’g Christmas Party.

Luoy man god kaayo ang mga ilong tuwapos ning panahona karon sa Pasko. Ungo tuod siya apan may kasingkasing usab siyang maluoy labi nag mga bata nga way mga ginikanan.

Tuod, nanugot ang mga bata nga iyang gipang-imbitar. Ug didto sa iyang mansion, iyang gipakaon ang mga bata og mga lamiang pagkaon ug kay unom man sila ka buok, unom ka lainlaing potahe ang iyang gipaluto sa iyang kusinero.

Pagka gabii may nangabot usab nga mga silingan nila nga mga bata. Suod man god niya ang mga ginikanan niini kay wala man lagi mahibawo nga siya usa na ka ungo nga gipatakdan didto sa England. Nia ning mga bata aron moapil pod sa Christmas Party nga pagahimuon karong gabii. Gisugdan dayon ang Christmas Party ug nalingaw pag-ayo ang mga bata. Duna siya’y gisuholan nga maoy mo-host sa maong kasaulogan ug maayo kaayong modala og palingaw sa mga bata.

Nalingaw usab si Todyong sa iyangnakita. Unya, nakurat siya kay mao may iyang nakita sa paghangad niya sa langit nga takdol ang buwan. Ug namatikdan niyang migimok ang iyang kalawasan ug dayon nausab ang iyang hitsura.

Karon, wala nay makaila kaniya kay laksot kaayo siya’g nawong. Apan wala siya malimot, nahinumdom siya sa gipangputos niyang mga regalo alang sa mga bata. Iya karon kining ipanghatag ug siya gyud mismo ang modunol niini ngadto kanila.

“Merry Christmas, mga bata, nia ko’y mga pinaskohan ninyo, sige dawata ni ninyo kay mahalon  ning mga sininaa,” matud ni Todyong nga nagbarog sa may atbang sa mga bata.

Naglumbag panuol ang mga bata aron pagkuha sa ilang mga pinaskohan ug sila nagtuo nga ang bayhon karon ni Todyong nga usa na ka ungo usa lang niya ka maskara o takoban nga iyang gisul-ob.

“Nindota nimo’g custom, uy, Sir Todyong, mora ka mag ungo ana!!!! Yeeeeepeee!” namakpak ang mga bata. “Merry Christmas, Sir Todyong! Ug salamat kaayo sa mga pinaskohan nga among nadawat gikan nimo!!”

Ug mitulo ang mga luha ni Todyong tungod kay dili takoban ang nakita karon sa mga bata, kun dili ang bayhon sa tinuod niyang pagkatawo nga ungo. Ug mitubag usab siya, “Merry Christmas usab kaninyo!!!” -- (Kataposan)