Dugos Ni Eva

Gula 192

Wala ko motingog. Ang tinuod, gusto unta kong mo-day off. Pero misantop sa akong hunahuna nga basin mag-atang si Paul inig gawas nako sa balay aron i-check in ko sa hotel. Nausab ang akong plano. Dili na lang ko mo-day off.

“Dili ko molakaw ron,” giingnan ko si Paul. “Anhi ra ko sa balay tibuok adlaw.”

“Gusto ka tingaling makalikay nako, no,” matud ni Paul.

“Bahala ka na kun unsay imong gihunahuna. Basta kay dili ko molakaw ron. Wala koy ganang mo-day off.”

Walay nahimo si Paul. Wala na lang usab siya molakaw nianang adlawa. Pero nianang pagkagabii, wala gyud malimot ang kanahan sa naandan na niyang tulomanon. Misulod siya sa akong kuwarto sa servant’s quarter. Ug sa makausa pa, iya na sab nga giangkon ang akong pagka babaye. Mirebansin siya’g katulo. Hapit na mag-alas dose sa tungang gabii sa dihang migawas siya sa akong lawak. Natagbaw siya pero ako nabitin. Uga ang akong pagpakigpinarayganay niya.

Pagkabuntag, wala ko’y kadasig nga miatubang sa akong mga bulohaton. Nahasol pag-ayo ang akong hunahuna mahitungod kang Paul. Misantop sa akong hunahuna nga tug-anan si Nang Badang sa gibuhat ni Paul nako. Apan nausab ang akong hunahuna. Kun tug-anan nako si Nang Badang sa kamatuoran, seguradong mangutikuti kini. Ug hayan maugkat ang bahin sa tinagoang relasyon namo ni Carlo.

Human sa pamahaw, milakaw si Mr. Prax Vidoya kuyog si Paul nga iyang personal driver. Kami na lang duha si Nang Badang ang nahibilin sa balay.

“Ikaw lay limpiyo sa lawak ni Sir Prax, Day Eva,” nagkanayon si Nang Badang samtang nagtambayayong mi pagpanglimpiyo sa sala.

“Oo, Nang,” misanong ko.

“Limpiyohi sab og apil ang banyo sulod sa iyang kuwarto. Ilisi sab ang bed sheet sa iyang kama.”

Misaka dayon ko sa taas sa balay. -- Sumpayan pa