Boomerang

Naluoy ko kang Zeny, daw  way  kabutangan  ang  kaguol  nga iyang gibati. Nagpamahid siya sa iyang mga luha sa gikuptang panyo.

"We're best friend, Loida. Please help me."

Naglisod ako pagtubag kang Zeny. Di ako ang tag-iya sa hukom ug kasingkasing ni Kuya Abner. Lawom god kaayo ang akong pagpanghupaw. Gikuptan ko ang usa niya ka palad. Namatikdan ko nga kami ra ang gitan-aw sa kauban namong mga kustomer sa Chowking.

"Suwayan ko, Zeny. I'll try my very best to help you." Hapit di ko makatan-aw sa nanghubag nga mga mata ni Zeny. Tingpaniudto niadtong tungora. Ug sa Chowking kami nangaon kay gustong makigsulti si Zeny kanako. Ug mao kini karon, iyang giprangka nako ang iyang problema. Mabdos siya ug si Kuya Abner ang amahan.

Nagtungha ko sa Accountancy sa usa ka unibersidad sa Sugbu. Duha ra kaming magsuon si Kuya Abner. Nakahuman na siya sa komersiyo ug aduna nay maayong trabaho sa siyudad. Si Zeny maayo sab og trabaho sa usa ka banko sa siyudad. Guwapa si Zeny. Gusto unta kong tawgon siya’g Ate, apan nagpugong ko kay wa pa man sila magkadayon si Kuya Abner.

Human sa akong klase nianang pagka hapon, midiretso ko’g pauli sa among balay sa dalan Ramos. Tungod sa traffic, ngitngit na sa akong pag-abot. Alas sayis ang last subject nako. Diha sa among sala si Kuya Abner. Nakigsulti dayon ko niya.

"Kuya, husto ka na sa edad. Angay ka nang magminyo," matud ko.

"Nganong nakasulti ka man niana, Loida?" Mahibulongong mitutok nako ang akong magulang.

"Mabdos si Zeny, Kuya. Nagkasulti mi. Naghilak man gani siya."

"Nasayod ko. Iya kong gisultihan.”

Morag wala lang sa hunahuna ni Kuya Abner ang nahitabo.

"Unya?"

"Wa pa ko maghunahunag minyo, Loida. Gawas pa, si Zeny man sab ang nag-una-una nako. Morag siya ang nangulitawo nako."

Wala gyod nako makumbinser si Kuya Abner. Tulo na ang iyang gipamabdosan. Misamot ang kaluoy kong Zeny. Guwapo hinuon ang akong magulang. Madani gyod ang babaye kaniya.

Usa ka gabii, wala dayon ko makapauli. Nakigpanan-aw og sine kanako si Dondon, akong hinigugma nga schoolmate nako. Unya, gikan sa sinehan, wala ko makabalibad kaniya dihang gidala niya ako sa motel.

"Basig pasagdan ko nimo, ha?" Nagkurog ang akong tingog dihang gipahigda niya ako sa kama.

"Di kana mahitabo, Loida. Love god ka nako."

May nahitabo gyod kanamo ni Dondon niadtong tungora. Nasundan pa gyod kini. Hangtod nga nagsabak ako sa anak ni Dondon. Gisultihan ko siya sa tanan.

"Don't worry. Sunod semana mahuman na ang semester. Mopauli ko sa Davao ug sultihan ko ang akong parents bahin sa atong pagpakasal."

"Basta, ha?" Nalipay ako sa gipasalig kanako ni Dondon.

Apan milabay na lang ang usa ka bulan. Duha ka bulan. Tulo ka bulan. Wala na magpakita kanako si Dondon. Ug nasayran ko na lang nga mi-transfer na siya’g eskuyla sa Davao.

Naghilak kong misumbong kang Kuya Abner.

"Ako ang gibaslan sa imong pagbinuang sa mga babaye, Kuya!" Midanguyngoy ko pag-ayo.

Walay tubag nga akong nadungog sa akong magulang. Hinuon, sunod-sunod nga pangagho ug panghupaw ang akong nasaksihan kaniya. Miluom na lang ako sa paghilak tungod sa sobrang kaguol. (Kataposan)