Ang Babaye sa Bentana

Gula 21

Milingilingi si Cyrus. Mitan-aw siya ngadto dapit sa kosina diin didto usab nahimutang ang banyo. Naligo pa si Cheska didto ug nabanabana niya nga dugaydugay pa kining mogawas. Dili pa dugay nga misulod si Cheska sa banyo.

Naikag si Cyrus pagsusi sa diary ni Cheska. Gusto siyang makakuhag bisan unsa nga kasayoran, labina gyud sa lovelife sa dalaga. Interesado na siya bahin sa kinabuhi ni Cheska labina karon nga nagkasuod na sila’g maayo.

Gisugdan dayon niya pagpakli ang diary ni Cheska. Matag karon ug unya motan-aw siya didto dapit sa may kosina aron makabantay siya kun mogawas na si Cheska gikan sa banyo. Gipaspasan niya’g pakli ang mga panid sa diary.

Unya, napahunong siya sa makadiyot dihang nabasahan niya ang ngalan ni Wayne Ampolis. Mikunot ang iyang agtang. Unsay buot ipasabot niini? Kaila ni Cheska ang iyang manghod hinungdan nga nalakip kini sa diary sa dalaga?

Aron matubag ang iyang kalibog, gipadayon niya pagpakli ang diary. Hangtod nga nadiskobrehan niya ang matuod nga pagka tawo ni Cheska. Daw dili siya makatuo. Pero mao kini ang giasoy sa diary busa kinahanglang iya kining tuohan.

Sumala sa iyang nabasa sa diary, si Cheska ug si Melissa Viloron usa ra. Nagtakoban diay si Melissa sa ngalan nga Cheska aron dili na kini mailhan sa mga tinugyanan sa balaod nga nangita niini. Si Cheska mao diay si Melissa nga girlfriend sa iyang manghod nga si Wayne. Si Cheska mao diay ang babaye nga gipangita ni Cyrus aron kini panimaslan tungod sa kamatayon sa iyang igsuon.

Nahisulat usab sa diary ang petsa sa pag-ilis ni Melissa og personahe ngadto sa pagka Cheska. Nagpa-plastic surgery diay siya sa iyang nawong aron dili na siya mailhan. Usa ka espesyalistang doktor nga nakatungha sa gawas sa nasud ang mipahigayon sa pag-opera sa panagway ni Melissa. Complete makeover ang operasyon.

Nakapanglingo si Cyrus sa iyang nasayran. Husto gyud diay ang pangagpas sa kapolisan nga wala makagawas sa Sugbu si Melissa Viloron. Lisod lang siyang dakpon kay nag-ilis na man siya’g panagway ug migamit usab og takoban nga ngalan. -- Sumpayan pa