Gabii na kUn manungkab

Sa unang higayon, wala motuo si Gumer sa dihang gisultihan siya ni Abay niya Nito nga duna gyoy yawa nga manungkab nga iatol gyod og gabii.

"Morag di ko katuo nimo, Bay Nito, da...." matud ni Gumer, "kun iring pa hinuoy giingon mo nga manungkab, kana, motuo ko labi nag iring nga gutom. Wala gyod na sila pili, maadlaw man o magabii manungkab gyod 'na sila."

"Dili iring ang giingon ko, Bay Gumer," ni Nito pa, "klaro gyod nga yawa ang nanungkab!"

Mikatawa lang si Gumer sa kadili katuohan nga gisulti sa iyang suod higala. Hinuon, dili lang si Nito ang mitaho ni Gumer. Misulti usab sila si Botyok, Iloy ug Dodong sa ilang nasaksihan sa pipila na ka mga gabii. Ug ang nakapahibulong og dako ni Gumer kay ang yawa, magsakay kuno’g motorsiklo. Adto ra ba kuno ihunong sa kalibonan. Mainampingon ug magpanglingi kunong molakaw padulong sa iyang balay ni Gumer.

"Yati na hinuon," nahasinta ang tingog ni Gumer, "ang ako gyong kaugalingong balay maoy panungkaban?"

Misantop sa iyang hunahuna, nga kun tinuod ang gisulti sa iyang mga silingan, duna gyud diay mosungkab sa inun-onan sa iyang asawa, nga iatol gyod og gabii nga siya si Gumer atua sa iyang trabaho isip security guard sa balay-lungsod. Kinahanglan na gyod, sa hunahuna pa niya, nga iya kining panup-an kun unsa gayod kini katinuod ang ilang giingon?

Apan lagi, dili gyod siya makatuo nga si Lendy magluib kaniya. Buotan si Lendy. Kasaligan gayod nga pagkaasawa. Apan ang pipila ka mga taho, nakapalibog na hinuon kaniya. Unsa gyod kaha kini katinuod?

Usa ka gabii na usab. Gabii sa pagpamasin ug sa pagsuway sa pagpanuop o pagpangukoy. Matugnaw ang kalikopan nga gibisbisan sa pagpanaligsik ug sa panagsang pagpangilat ug pagpangdugdog.  Ang  motorsiklo nga maoy iyang pagasakyan, didto niya ibilin ubos sa naglambongay’ng masinetas dili layo sa dalan munisipal.

Wala lang tuyoa, gibati siyag kakulba. Ug sa hilom nakapangyamyam siya: Ginuo, dili unta tinuod ang gisulti nila nga dunay yawa nga manungkab sa amoa.

Maayo kaayo niyang pagkapuwesto sa iyang gihup-an. Wala siya mahasol sa taligsik kay nagkawo siyag gura ug nagsul-ob sab og suweter nga itom. Taudtaod na siyang naghupo apan wala siyay nabati nga inandar sa motorsiklo nga miabot. Ah, dili gyod diay tinuod nga naglimbong si Lendy. Unya mituyhakaw siya.

Apan ... mikalit siyag tikubo aron sa paghupo. Dihay aninong nanaog sa ilang hagdanan sa kusina. Tawo gayod. Nagdiyaket. Busa mikamang siya aron atngan ang anino nga nagkaduol sa iyang nahimutangan. Andam na si Gumer sa iyang laraw nga maoy iyang buhaton sa yawa. Diha sa iyang mga kamot ang plaslayet nga dunay duha ka dagkong bateriya nga sulod niini ug ang botelya nga plastik nga dunay sulod aksido. Ug sa diha na sa iyang duol ang iyang giatngan, giiwagan dayon niya ang nawong sa gidala niyang plaslayet.

"Huuuu!!!" nakurat kini. "Ki-kinsa ka???"

Wala siya motubag apan gikalitan kini niyag sumbag sa nawong ug kini nahasarasay ug natumba. Nahayang sa yuta. Giiwagan na usab niya ang nawong ug gisumbag na usab hangtod nawad-an og panimuot. Gibuboan dayon ni Gumer og aksido ang nawong ug miping-it kini sa kahapdos.

Iya na kining nailhan sa nawong. Ang drayber sa habalhabal nga suki nga sakyanan ni Lendy kon motrabaho siya sa Health Center sa bukirang dapit sa baryo Lumboyan. Ug unya, sa tumang pagmatngon nagdali siyang mipaingon sa ilang balay ug nagkinto nga misaka agi sa hagdanan sa kusina. Nalilian niya si Lendy sa giwang sa bungbong amakan, binanwagan sa dekombateng lamparilya nga nagbitay sa haligi. Nagtapis kinig tualya sa katunga sa iyang lawas, sa ubos nga bahin ug ang ibabaw duas ang duha ka bungtod nga wala pa maunsaay sanglit wala pa kini kasus-ig bata kay wala pa man silay anak. Nanarapo kini sa nawong, sa dughan ug dayon gitrapo ang labakara sa iyang bilahan. Natataw gayod ni Gumer nga gipaningot ang iyang asawa.

Sa hilom nakaingon siya: Tinuod gayod ang ilang gisulti. Tinuod gayod! Ug unya, nagkinto siyang nanaog. Paspas ang iyang mga lakang nga mipaingon sa nahimutangan sa iyang motorsiklo. Mobalik dayon siya sa munisipyo aron paglingla unya sa buot magpakisayod sa gidangatan sa yawa nga sungkaban! (Kataposan)