Dugos Ni Eva

Gula 190

Sa maong gabii, giangkon ni Paul ang akong pagka babaye sulod sa pito ka higayon. Human siya natagbaw sa pagpahimulos sa akong lawas, migawas na siya sa akong lawak. Nahibilin ko nga nagpangagot ang mga ngipon sa kalagot. Bisan miabot usab kanako ang gana dihang gipahimuslan ni Paul ang akong pagka babaye apan kini nagbilin og tunok sa akong dughan. Wala man god ko makagusto kang Paul. Napugos lang ko pagtugyan ngadto kaniya sa akong lawas sa kahadlok nga iyang tinud-on ang bahad niya nga iyang tug-anan si Mr. Prax Vidoya mahitungod sa relasyon namo ni Carlo kun dili ko itugyan kaniya ang akong pagka babaye.

Pagkapait sa akong gidangatan. Nagtuo ko nga makabangon na ko sa hingpit human mabiktima sa gang rape dihang miabot si Carlo sa akong kinabuhi. Apan ania na man usab si Paul nga mapahimuslanon kaayo sa higayon. Wala ko masayod kun unsay angay kong buhaton aron makalikay ko kang Paul. Kun mobiya ko sa panimalay sa mga Vidoya, asa man sab ko mopaingon? Mangita na sab kog laing trabaho. Nahinugon ko sa akong trabaho sa banay’ng Vidoya kay sayon ra kaayo. Buotan pa gyud ang akong amo.

Hinuon, miingon si Paul nga may tinagoang kinaiya si Mr. Prax Vidoya. Bangis kuno kini kun masuko. Posibleng gilansisan lang ko ni Paul aron mosugot ko sa gusto niyang mahitabo. Apan nakaseguro ko nga masuko gayod si Mr. Vidoya  sa higayon nga masayod  siya nga nakigrelasyon ko sa iyang anak nga parion. Kini ang gikahadlokan ug gikabalak-an nakog maayo. Dili ko gustong masuko ang akong agalon nako.

Tulin nga nanglabay ang mga adlaw. Mitangkod nang usa ka bulan nga si Paul nagpadayon sa pagpahimulos sa akong pagka babaye. Dili ko makatutol sa iyang buhaton nako kay modayon man siya’g bahad nga tug-anan niya si Mr. Vidoya sa relasyon namo ni Carlo kun magdumili ko sa gusto niyang mahitabo tali kanamo.

“Hangtod kanus-a man kutob ang pagpahimulos mo kanako, Paul?” Gipangutana ko siya usa ka gabii niana.

“Hangtod nga gusto pa kong modimdim sa imong katam-is, Eva,” niya pa. -- Sumpayan pa