Ang babaye sa bentana

(Gula 15)

Gitutokan niya’g maayo ang babaye nga nagkaon aron pagseguro nga wala siya limbongi sa iyang panan-aw. Dili mahitabong masayop siya. Si Cheska gyud ang iyang nakita, ang babaye nga una niyang nakita sa may bentana sa balay nga nahiatbang sa balay nga iya pod nga gipuy-an.

Bisan duna pay bakanteng mga lamesa apan wala mopahimutang si Cyrus didto. Miduol hinuon siya sa lamesa nga giokupar ni Cheska.

“Hi...” gitimbaya niya ang babaye nga nagkaon.

Miyanghag ang babaye pagkadungog sa iyang tingog. Ug daw nakugang kini dihang nasuta nga siya’y tag-iya sa tingog nga nagsangpit niini.

“H-hello...” Mao ray natubag sa babaye.

“Puyde bang mo-share sa imong table?”

“Why not? Silingan god ta didto’s Sitio del Pasio.”

“Thanks.”

Gipahimutang dayon ni Cyrus ang dala niyang mga pagkaon sa ibabaw sa lamesa. Unya milingkod siya sa bakanteng lingkoranan nga atbang sa gilingkoran ni Cheska. Misugod dayon siya’g hungit sa pagkaon.

“Ig-unsa nimo si Noy Gunding?” Nangutana si Cheska samtang nangaon sila.

“Boarder lang ko niya,” laktod nga tubag ni Cyrus.

“Bag-o lang kang nagpuyo sa ila, no?”

“Oo. Bale...ikaduhang adlaw pa lang ron nako sa pagpuyo sa ilaha.”

Ug si Cheska ang unang nagpaila sa kaugalingon niini kaniya.

“Ako si Cheska,” matud sa babaye nga mitunol sa tuong kamot niini kaniya alang sa pakiglamano.“Cheska Bagseco.”

“Ako sab si Warner,” nangalyas gihapon si Cyrus. “Warner Rasalas.”

Nagpig-itay sila sa kamot. Dugay kaayong gibuhian ni Cyrus alyas Warner ang kamot  sa babaye nga iyang gigunitan. Hamis kaayo kinig palad. Ug ingon sa midangilag og kainit ang palad niini nga nabag-id sa iyang palad. – Sumpayan pa