(Gula 13)
“Tawga lang kog Warner, Noy,” nangalyas si Cyrus sa pagpaila sa iyang kaugalingon ngadto ni Noy Gunding. “Warner Rasalas.”
“Hain ka man magtrabaho, Dong Warner?” Sukit ni Noy Gunding.
“Sa usa ka call center, Noy,” gibakakan niya ang lagas aron dili na kini magsige’g pangutikuti kaniya.
Dihang wala na mopasupot og laing pangutana si Noy Gunding, siya na usab ang nangutana ngadto niini.
“Nakaila ka ba nianang babaye nga nagpuyo sa atbang nga balay, Noy?” Tugob sa interes niyang pakisayod. “Kana gong balay nga pinintalan og abohon.”
“A, si Cheska?” sa lagas pa.
“Cheska diay iyang ngalan?”
“Oo. Bag-o ra man na siyang nagpuyo diha. Wala pa tingaliy usa ka buwan. Sa akong nasayran, taga probinsiya siya. Nag-inusara ra na siya’g puyo diha.”
“Ang iya diay’ng mga ginikanan?”
“Ambot? Tua tingali sa ilang probinsiya.”
“Arang-arang tingali sila’g kahimtang kay entirong balay man gyud ang iyang giabangan. Mahal gyud tingali ang paabang nianang balaya.”
“P10,000 ang buwan, sa akong nasayran.”
‘Tiaw mo kana? Dili kana maabot sa ordinaryo rag pagkabutang.”
Igo lang mipakibo sa abaga si Noy Gunding.
“Nag-eskuyla ba kana si Cheska dinhi sa Sugbu, Noy?” Sukit ni Cyrus sa lagas. “O nagtrabaho na?”
“Mao kanay wala nako hisayri, Dong,” nagkanayon si Noy Gunding. “Morag wala man tingali magtrabaho kanang babayhana kay anaa ra man siya kanunay sa balay. Kun molakaw man, wala sab ko makamatikod nga nag-uniporme busa wala sab tingali mag-eskuyla. Basta sa akong paniid, naa ra siya kanunay sa balay.”
Sa nasayran ni Cyrus, kalit lang siyang nakabaton og interes nga mailhan og maayo ang maong babaye. – Sumpayan pa