Ang babaye sa bentana

Gula 12

Nagpadayon sa pagdula-dula sa kaisipan ni Cyrus ang babaye nga iyang nakita sa may bentana sa atbang nga balay. Sukad nga iya kining nakita, ingon sa dili na kini mawagtang sa iyang hunahuna. God! Daw sa napaghilantawan niya nga masumpayan dinhi sa Sugbu ang iyang binuhatan sa didto pa siya sa Manila.

Apan unya, nasagmoyo si Cyrus. Misantop sa iyang hunahuna nga dili na siya angay pang makiglambigit ngadto sa usa ka babaye. Nataptan na siya sa HIV virus ug anaa na sa first stage nga acute infection niini. Maalaot lang ang babaye nga iyang ikarelasyon gumikan sa makalilisang sakit nga mitakboy kaniya.

Dili na siya buot nga may lain pang mabiktima sa HIV virus nga mitakboy kaniya. Nasayod siya nga the future of HIV/AIDS all over the world is expected to be grim or alarming. International projections indicate that about 45 million new HIV infections worldwide between now and 2010 are in no way inevitable.

Dili siya gustong maka-contribute sa pagkaylap sa HIV busa kinahanglang pugngan niya ang iyang biga. Pero ingon sa dili kabalibaran ang nagpangamay nga katahom sa babaye nga iyang nakita kaganina sa may bentana sa atbang nga balay. Wala siya masayod kun hangtod kanus-a nga makapugong siya sa iyang kaugalingon nga igo lang magsud-ong sa kaanyag niini.

Migawas si Cyrus sa iyang lawak aron maligo. Pag-abot niya sa kosina, iyang natukmaan si Noy Gunding nga nag-ilis og flourescent sa suga. Gitimbaya niya kini. Mibalos usab kini pagtimbaya kaniya.

“Unsa gani to’y ngalan mo, Dong?” Sukit ni Noy Gunding nga wala pa masayod sa iyang ngalan kay wala man siya makapaila sa iyang kaugalingon ngadto niini kagahapon sa ilang panaghinabi.

Nakahukom siyang dili tug-anan si Noy Gunding sa matuod niyang ngalan. Kabahin kini sa iyang plano sa pagpanimalos kang Melissa Viloron.  Kinahanglang walay usang masayod nga igsuon niya si Wayne Ampolis, ang boyfriend ni Melissa nga naghikog tungod sa salaod nga nahimo sa maong babaye. -- Sumpayan pa