Wala mangumedya ang komedyante

Sukad sa gagmay pa kaming bata suod ko nang higala si Ricarte. Gikan sa grade one hangtod na sa high school. Apan tungod sa nasinating kawad-on sa panginabuhi sa iyang mga ginikanan nihunong siya sa pag-eskwela. Wala na siya mopadayon sa pagtungha sa sekondarya ug nanarbaho nalang siya sa siyudad sa Sugbu.

Naila siya sa among dapit isip usa ka komedyante nga pagkatawo. Sa imong tan-aw mora lang og walay gihambin nga mga problema. Apan may mga problema diay siya nga gitago sulod sa iyang kasing-kasing nga dili gustong ipaambit sa uban. Niabot ang panahon nga nibati siya og dili tiaw nga gugma–gugma nga lunod patay ang kahimtang. Nagkahimamat sila sa iyang hinigugma sa siyudad kay nagtungha man ang maong babaye sa usa ka unibersidad dinhi sa Sugbu. Langyaw lang ang maong babaye ug lumad nga taga Leyte, ug atua usab ang iyang mga ginikanan nanimuyo. May pipila sa iyang mga paryente nga iyang gidangpan dinhi sa siyudad sa Sugbu.

Niabot ang panahon nga nakahukom ang mga ginikanan sa babaye nga adto nalang patiwasa sa pag paeskwela sa ilang dapit, ug gikaguol kini pag-ayo ni  Ricarte kay magkalayo naman unya sila. Apan nakahukom siya nga adto manimpalad sa pag panarbaho sa dapit diin nanimuyo ang iyang hinigugma ug aron sa ingon dili sila magkalagyo.

Bisan paman sa iyang gipakitang paningkamot ngadto sa ginikanan sa babaye wala gihapon makagusto kaniya, kay lagi kakha tuka lang ang kahimtang niini. Supak lang gihapon ang mga ginikanan sa babaye nga maoy mamahimong kapikas sa kinabuhi sa ilang anak.

Wala mawad-i og paglaom si Ricarte bisan paman sa mga sakit nga pulong nga iyang nadungog. Padayon ang kinawatkawat nila nga panagkita, hangtod nga niabot ang panahon nga nasakpan sila sa amahan sa babaye ug gipalayo na hinuon sa hingpit. Gitagoan sa layong dapit ug wala na niya igkita pa.

"Kung dili ko makita pagbalik ang akong hinigugma wala nay rason nga magpabilin pa ako niining kalibutan," nagkanayon si Ricarte nga namulong.

Apan wala motuo ang mga higala ni Ricarte tungod kay komedyante man lagi kini. May gihatag siyang contact number sa iyang iyaan nga atoa sa Manila.

"Palihog nalang ko og contact ana bay ha ..." matud pa ni Ricarte sa usa ka higala. Nahidangat si Ricarte sa maong dapit nga walay mga paryente nga nakahibalo apan tungod sa iyang dakong gugma, gisunod niya ang pinitik sa iyang kasing-kasing.

Ug sa wala damhang panghitabo sayo sa buntag niana mao nalang ang ilang nakit-an nga nagbitay na kini si Ricarte sulod sa karaang payag nga wala nay kinabuhi. Naghikog siya uban sa dakong problema mahitungod sa gugma. Gisunod niya ang pinitik sa iyang kasing-kasing nga nakaingon sa iyang kamatayon.

Sa balaod sa Diyos, salang mortal ang pagkutlo nato sa atong kinabuhi. Busa kung aduna man ugaling kitay problema dili lang kita magpakawala sa paglaom! Kay sa inyong pagsungasong sa kangitngit adunay kahayag nga nagpaabot sa tumoy niini. (Kataposan)