Buta ang gugma

Pagkasayod nako nga minyoonon na si Julius ngadto kang Kirsten, nakaamgo ko nga panahon na nga taposon ko ang akong pagpakabuang kaniya. Wala koy laing gibasol sa nahitabo nako kondili ang ako ra sab nga kaugalingon. Pagkadako kong hungog. Nahimo kong tanga tungod sa gugma!

Maayo gyud nakong pagkasulod sa laang ni Julius. Abi kog tinud-anay ang iya diri nako sa sinugdanan. Apan igo lang diay ko niyang gipahimuslan. Naimpas pa lakip ang kuwarta nga sulod sa akong ATM. Nahitabo kini tungod sa naghingapin kong pagsalig niya. Tanga kong dako maong nahulog ko sa gahong sa panglingla ni Julius.

Gihukman kong kalimtan sa hingpit si Julius. Mahimo tingaling mopasaka kog legal nga lakang batok niya tungod sa iyang pagpanglingla nako. Pero dili na ko gustog gubot o eskandalo. Pasagdan ko na lang siya. Gihangad ko na lang sa Dios ang tanan.

Sa nahitabo sa akong kinabuhi, akong natugkad nga buta gayod diay ang gugma. Nabutaan ko tungod sa sobra kong paghigugma kang Julius maong wala koy gibiling reservation alang sa akong kaugalingon. Magbasol man ko apan ulahi na ang tanan.

Natugkad ko usab nga wala koy supernatural powers nga sarang makabuntog sa tentasyon. Walay maayong laki atubangan sa tentasyon. Ang tanan bulnerable sa pagsulay. Ug walay relihiyon dinhi sa kalibotan nga superyor kay sa ubang tinuohan. Bisan unsa pay denominasyon sa tawo, ang tanan parehong nag-exist sa usa ka danglog nga kalibotan. Maong walay relihiyon nga makaluwas. Ang grasya sa Dios maoy makaluwas.

Nanglabay ang mga adlaw. Daw damgo nga nagkita kami pag-usab si Alvin. Akong nasayran nga nagkabuwag sila si Litlet kay dili gyud sila magkasinabot. Nangulitawo siya pag-usab nako. Gidawat ko ang iyang gugma. Malipayon ko sa among relasyon.

Nagplano kong itug-an kang Pastor Bal Fuentes ang relasyon namo ni Alvin. Bahala nag i-excommunicate ko sa among simbahan. Ang importante nga nagminahalay mi si Alvin bisan managlahi ang among relihiyon. Mosagop na lang ko sa prinsipyo sa ecumenicism aron motunhay ang among pagminahalay. Wala nay panagsumpaki sa baroganan nga makaguba sa among pagminahalay. -- Kataposan