Pastilan, kun dili pa lang tinuod ang akong pagpaninguha sa gugma ni Britney, dili gayod unta ako mangahas ug maghago sa pagpamisita kaniya sa ilang balay karon. Kadaghan na man god ko niya insultoha. Mangasaba siya kun mangamoral na ko.
Estrikta ug maldita kaayo si Britney. Gani, sa tanan kong mga higala ug kauban sa trabaho, ako ra man gayod ang nangahas sa pagpangulitawo kaniya. Ang tanan kong mga kauban nagkinto sa ilang mga lakang sa kahadlok kang Britney. Si Britney maoy chief accountant sa among kompanya. Matag higayon nga makigsulti ako kang Britney bahin sa akong gihalad nga gugma, mangasaba ug manginsulto dayon kanako kining babayhana. Apan nagpailob lang ako. Gipalapas ko sa pikas kong dunggan ang tanan niyang gipanulti. Kay dako ang akong tinguha nga maangkon ko ang iyang gugma.
Ug karon laging hapona nga adlaw nga Domingo nakahunahuna ako sa pagpamisita kang Britney sa ilang pinuy-anan. Bahala na og hikasab-an.
Mao kini ang una kong pagpamisita ni Britney. Ang iyang inahan maoy mibukas sa pultahan. Human ako makapaila sa akong kaugalingon, gipasulod ako niini ug gipalingkod sa sala human ko siya kasultihi sa akong tuyo. Iyang giadto si Britney sa lawak niini. Gikulbaan ko nga nagpaabot niya sa sala.
Wala dangtig dugay sa pagpaabot, migawas si Britney gikan sa iyang kuwarto. Mapahiyomon kini nga miduol kanako.
Milagro! Nakaingon ako sa hilom. Sukad karon pa ko pakitai ni Britney og nindot nga batasan. Sa una ugod, kanunay man lang kining magmug-ot kun magsultihanay kami. Unsa kahay nakaon niini karon nga maayo man ang gipakitang tinagdan?
"Milagro nga mianhi ka," matud niya.
"Mibisita lang," tubag ko. "Gusto kong magkasulti kita dinhi gayod sa inyong pinuy-anan. Ug milagro sab nga wa ka sapota karon."
"Sapoton ba god ko?"
"Gamay."
"Wa ka lang makasabot nako, James." Miingon siya. "Di ko gusto nga bisan asa lang tagbo-tagboa sa lalaki nga maninguha nako. Kun dunay buot maninguha nako, gusto ko nga anhi kami magkasultihanay sa ba'y. Mabarato man god ta nianang tagbo-tagbuon lang."
"Sa ato pa," misugod ako pag-atraka," kay namisita na man ko nimo karon, may paglaom na ko?"
"Uy, naunsa ka diha?" nakusog ang tingog ni Britney. Unya mikagiki siyag katawa.
"Bitaw, Brit. Unsa na man?"
"Aw, depende."
"Unsay depende?"
Mikatawa siya. "Ikaw god?"
"Aw kun akoy pagbut-on, gusto gyod nako nga magkauyab na kita."
"Segurista ka man diay?"
"Dili, uy. Dili lang ko gusto nga maunhan sa lain."
Gikusnit niya ang akong kilid. Niining higayona, may dala nang parayeg. Wala na ang iyang pagka suplada. – Kataposan