Buta ang gugma

Gula 45

“Nganong imo mang gipatangtang kanang imahen ni Sto. Niño diha sa altar?” Nangutana si Julius kansang nawong ligdong kaayo samtang mitutok nako.

“Dakong sayop ang inyong pagbaton nianang maong butang,” matud ko. “Ang bibliya nag-ingon nga dili kita pasimbahon sa mga dios-dios.”

“Tinuod kana. Pero makamatuod ka ba nga ang dios-dios nga giingon sa Bibliya mao si Sto. Niño? Unsa mang bersikuloha nato mabasa nga dios-dios si Sto. Niño?”

Wala ko makatingog. Pinilosopo ang argumento ni Julius.

“Aron magkasinabot ta, Jomelle,” ni Julius pa, “ayaw ipatigbabaw ang imong pagka born again Christian kun magkasulti ta kay di gyud ta magkasinabot. Managlahi tag relihiyon. Pero kay nagkahigugmaay man kaha ta, magrespetohay ta sa tagsatagsa nato ka tinuohan. Klaro ba ang akong gisulti?”

“Oo. ug.. sorry sa daw authoritative nakong sinultihan.”

Kadali ra sab nga nagkauli ang maayo namong  kabubut-on sa usag-usa. Human sa among panaglalis, nakahimo pa mig laing lovemaking session. Gibati ko ang hingpit nga katagbawan sa lawasnong kalipay nga among gisaw-an.

Ang nahitabo tali namo ni Julius nasubli sa makadaghan. Wala ko makasabot sa akong kaugalingon kun nganong dili ko siya kabalibaran. Magsunod-sunod lang ko kun unsay iyang isulti o buot mahitabo. Mora bag  dili kaya sa akong powers ang pagsupak sa iyang kabubut-on. Ang iyang gusto maoy kanunay matuman.

Kanunay ming mosulod sa usa ka pribadong lawak. Didto tilokon namo ang mga takna pagtagay sa lawasnong kalipay. Gibati ko ang kalipay sa among gibuhat apan  usahay makonsensiya ko. Tungod kay didto na lang kang Julius nagtuyok ang akong kalibotan, napasagdan  ko na lang ang akong mga kaakohan isip usa ka born again Christian.

Nanglabay ang mga adlaw. Nagpadayon ang panagtagbo namo ni Julius sulod sa usa ka pribadong lawak aron pagtagay sa kinawat-kawat nga kalipay. Makadaghan na maangkon ni Julius ang akong pagka babaye. Hangtod nga usa ka adlaw niana, nahinumdom ko nga na-delay ang pagtungha sa binuwan kong sakit. Nabalaka kog maayo nga tingalig mabdos ko. -- Sumpayan pa