Buta ang gugma

(Gula 43)

Dihang nakabaton na kog igong kaisog pagtubag, gitug-anan ko si Pastor Bal Fuentes sa tanan nga gusto niyang masayran. Akong giangkon sa iyang atubangan nga may relasyon kami si Julius. Nakugang siya sa kamatuoran nga akong gipadayag.

“Wa ka ba diay gihapon motagam, Sister Jomelle, human sa failure sa imong pagpakigrelasyon niadtong usa ka Benjie Soltan?”

“Lahi si Julius kay kang Benjie, Pastor,” matud ko.

“Wa silay kalainan, Sister. Managsama silang unbelievers. Ayaw kalimot sa giingon sa Bibliya nga be not unequally yoked with unbelievers. Kutob sa mahimo dili kita angay makigrelasyon sa mga dili born again Christians. Kun dili man malikayan, kinahanglang magpasakop siya sa atong simbahan.”

“Mipasalig si Julius nga andam siyang magpasakop sa atong simbahan, Pastor.”

“Ug mituo ka usab? Unsa ka dako ang garantiya nga tumanon niya ang iyang gisaad kanimo? Kanus-a man kaha siya magpabunyag?”

“Agdon lang nato ang iyang desisyon.”

“Seguroa nga dili ka mopalpak, Sister Jomelle. Ikaduha mo na kining paglapas sa atong mga patakaran. Ang imong pagpakigrelasyon sa usa ka lalaking unbeliever usa ka ground for excommunication.”

“Nasayod ko niana, Pastor. Ug kun masayop man ko sa akong desisyon, andam kong modawat kun unsay hukom sa simbahan alang nako.”

Human sa among panagsulti, mibiya dayon si Pastor Bal Fuentes sa akong gipuy-an. Misulod ko sa akong lawak ug mihigda sa kama. Gikuligaw sa kahasol ang akong hunahuna. Daghang mga butang ang nagsamok sa akong kaisipan. Naglibog na ko!

Maayo gani kay nakadawat kog inspiring text message gikan ni Julius. Naibanan og diyotay ang gibati kong kahasol.

Biyernes sa udto. Nakadawat kog text gikan ni Julius nga padalikyaton ko niya sa iyang law office.  Gi-dismiss nakog sayo ang akong mga tinun-an sa grade one nianang pagkahapon. Miadto ko sa law office ni Julius. – Sumpayan pa