Usa ka buotang ulitawo si Mando. Nagpuyo sa karaang balay nga kabilin sa iyang ginikanan. Nag-inusara lang siya pagpuyo kay wala pa man kini makakita og kapikas sa iyang kinabuhi. Gibati og kahaw-ang sa kinabuhi si Mando tungod kay wala man siya'y kasumbungan o kaha walay masampit panahon nga siya manginahanglan og pakitabang. Medyo layo-layo og kasilinganan si Mando kay nahimutang man sa hilit nga dapit ang iyang pinuy-anan.
Nianang sayo sa kagabhion nabati na usab niya ang bahakhak sa katawa sa usa ka babaye nga nagagikan sa dakong kahoy nga nahimutang sa kilid sa ilang balay. Sa wala pa mamatay ang iyang amahan ug inahan gisuginlan na siya niini nga may dili ingon nato o mga tawo nga nanimuyo sa laing kalibutan nga magpakita sa maong dapit. Apan dili siya motuo niini tungod kay wala man siya makakita o kaha wala makasaksi, apan karon nakatuo na gayod siya sa giingon sa iyang ginikanan.
Inanay nga nagkaduol ug nagkakusog ang maong katawa sa usa ka babaye. Nanglimbawot ang iyang mga balahibo. Iya lang kining gipaminaw sulod sa iyang balay. Ingon sa anaa na magagikan ang tingog sa iyang nataran. Buot siyang makakita niini. Iyang giablihan og diyotay ang bintana ug iya kining gilili. Nisiga ang iyang mga mata sa iyang nasaksihan. Usa ka matahom nga babaye ang anaa sa iyang nataran. Nahanaw ang kahadlok nga gibati ni Mando. Iya kining gipangutana.
"Kinsa ka?" sukit pa niini ngadto sa babaye.
Igo lang mitan-aw ang babaye kaniya ug ni bahakhak na usab og katawa nga ingon sa nakigsayaw sa mga aninipot sa ilang palibot. Malipayon ug madasigon ang panagway sa babaye. Hingpit nang nawala ang gibating kahadlok ni Mando.
Ug sa wala damha nipuli sa iyang kasingkasing ang kaibog. Gipangutana na usab niya ang baaye.
"Kinsa ka man gayod miss?" dugang pa niini.
"Ako si Prinsesa Anita ... usa ka engkantadang dalaga," tubag pa sa dalaga kaniya. Nitiurok sa gibarugan si Mando ingon sa gilansang ang iyang mga tiil. Makabibihag ang pamayhon sa maong dalaga tungod sa naangkon niining katahom.
Nikitib ang mga ngabil ni Mando ug nilitok ug mga pulong.
"Sayang lang kay dili managsama ang atong kalibutan Prinsesa Anita," matud pa niini. Apan sa wala damha nitubag ang babayeng engkantada kaniya. "Dili kana problema dad-on ko ikaw sa among kalibutan. Ikaw ang himuon kong prinsepe sa akong kinabuhi."
Ug walay pagsupak nga gipakita si Mando. Andam usab kining mokuyog ni Prinsesa Anita sa ilang kalibutan aron takduon ang duha ka pagbati nga gihugpong sa kapalaran. – Kataposan