Gula 33
Miduol dayon si Ivy sa akong nahimutangan. Ligdong kaayo ang iyang panagway.
“We need to talk,” niya pa.
Nanglingkod mi sa sopa sa may sala aron magkasultihanay mig maayo.
“Unsay atong panagsultihan?” Nagpakisayod dayon ko.
“Bahin niadtong lalaking kuyog mo kaganina,” laktod niyang tubag.
“Si Julius? Ngano man diay?”
“Sultihi ko sa tinuod, Jomelle? May relasyon na ba kamo niadtong lalakiha?”
Wala ko motubag sa iyang pangutana.
“Open kita sa usag-usa sukad pa kaniadto, Jomelle,” gikan ni Ivy. “DIli ko gustong may sekreto ka nang itago kanako karon.”
“Oo, Ivy,” matud ko. “May relasyon na kami si Julius.”
“My God, Jomelle. This is insane.”
“Nganong nakasulti ka man niana?”
“Wa ka ba makakita? Sa lihok pa lang daan niadtong tawhana, maila na nga dili siya kasaligan. Unsa bay iyang gipakaon nimo nga nagpalingla ka man?”
“Wa ko niya linglaha, Ivy. Gidawat ko ang iyang gugma uban ang kagaan sa kabubut-on. Nahigugma sab ko niya. Misalig ko niya. Nasayod kong dili ko niya pasakitan. Buotan si Julius. Nasuheto niya si Jap, ang bana ni Annabelle.”
“Nasayod na ba si Alvin nga may relasyon na kamo si Julius?”
“Gitug-anan ko na siya. Wa na koy problema bahin kang Alvin kay naminyo na man siya sa laing babaye.”
“U-unsa?”
“Naminyo siya wala madugay human niya masayri ang relasyon namo ni Julius.”
“Dili ka kaha magbasol sa imong desisyon pagpakigrelasyon kang Julius?”
“Bisan unsa may mahitabo, Ivy, dili ko kini pagabasolan tungod kay gihigugma ko si Julius. Ug nakaseguro kong secured ko uban niya.”
Nahilom si Ivy. Igo lang siyang nagpanglingo samtang naghunahuna sa akong gisulti. -- Sumpayan pa