Buta ang gugma

Migawas ko sa kuwarto aron pagsusi kun kinsa ang akong bisita. Pag-abot nako sa sala, nakugang ko dihang akong nakita ang lalaki nga naglingkod sa sala. Si Julius!

"Wa ba ko makatugaw nimo?" Gipangutana dayon ko niya.

"Wa man," dali kong tubag. "Pero wa ko magdahom nga ikaw ang akong bisita."

"May gipaabot ka ba diay nga laing bisita karon?"

"Wa, uy. Ang buot kong ipasabot, wa ko magdahom nga imo kong bisitahan karon."

"I see."

"Unsay ato?"

"Angay pa ba god nang ipangutana? Nia ko aron pagsukna bahin sa akong proposal nimo. I hope nga masayran na nako ang imong desisyon karong gabhiona, Jomelle."

Wala ko motingog. Miduko ko sa iyang atubangan ug naghunahuna. Sa akong pagyanghag, nasakpan ko siya nga nagsigeg tutok nako. Mibalik kog duko kay dili ko makaharong sa iyang tinan-awan. Pagkataudtaod, mibalik kog yanghag. Akong nasuta nga nagpadayon pa diay siyag tutok nako.

"Mahimo bang di ko nimo tutokan?" Giingnan ko siya. "Tingalig mahilis ko."

"I'm sorry," niya pa. "Di man god ko pul-an magsud-ong nimo. Matahom ka, Jomelle. Susama kag panagway ni Alicia Silverstone."

"Bulatiki ko, Dong."

"Tinuod lagi. How I wish nga maangkon ko ang imong gugma.''

"Nganong ako man gyod imong gipanguyaban nga naa may daghang babaye sa kalibotan? Dili man kay ako ray nagsayal."

"Tungod kay ikaw ang akong gihigugma. Nakaplagan ko diha kanimo ang hiyas nga akong gipangita sa usa ka babaye."

Wala ko motingog. Gihunahuna nako ang gisulti ni Julius. Gikilig ko sa hilom.

"Misamot ang akong interes nimo dihang nasayran ko nga born again Christian ka,'' nagkanayon si Julius.

"U-unsay buot mong ipasabot?" Gipangutana ko si Julius uban ang maduloton   nga pagtutok. -- Sumpayan pa