Nagbarog si Ramil sa usa ka eskina sa siyudad. Naibog siya sa managhigugmaay nga malipayong nagkuptanay nga naglakaw sa aseras. Nangandoy siya nga sama unta siya sa lalaki nga bisag batig nawong apan nakatrato og guwapa.
Dato tingali ang lalaki, matud niya sa hilom. Kun imo gyod analisahon, di gyod angay pareson ang duha. Seksi ang babaye, husto sa gitas-on, nagpanikad ang duha ka suso nga napiit sa bra, nipis og mga ngabil nga gipapulahan og lipstick, taas og ilong, nindot og porma ang nawong, ug ang mga mata daw katulogon kanunay.
Samtang ang lalaki, sus, mubo, tambok, bugason ang nawong, daw palwa nga nagkulob ang ilong. Hinuon nindot kinig pamiste ug naggilak-gilak ang mga alahas sa lawas.
Kasuwerte sa lalaki, apan mas labaw nga suwerte ang babaye, matud na usab niya sa iyang kaugalingon. Adunahan gyod ang lalaki sa iyang pagtuo. Nahanaw sa iyang mga mata ang duha. Unya maoy mipuli sa iyang panan-aw ang usa ka babaye nga nindot kaayog lawas ug guwapa didto sa iyang atbang.
Nagtan-aw kaniya ang babaye. Sa iyang tan-aw, manghod niya kinig lima ka tuig. Trayinta na ang iyang edad. Naibog kaha kaniya ang babaye? Nangutana siya sa hilom. Apan imposible. Bati siyag nawong. Kiang pa gyod.
Apan gisulayan niya ang iyang pagtuo. Iyang gikidhatan ang babaye. Milumpayat sa kalipay ang iyang kasingkasing. Mibalos pagkidhat ang babaye kaniya.
Iya kining giduol. Nagpahiyom ang babaye kaniya. Misamot kaputi ang mga paa niini dihang gikaatubang na niya kini. Nag-miniskirt lang kini nga giparesan og blusa nga walay manggas. Nadani gyod siya sa babaye.
"Hi! I'm Roy," paila nia.
"Hello! I'm Joy." Paraygong tubag sa babaye.
Gidapit niya kinig panihapon kay gabii na man. Misugot. Gikan sa restawran, iyang gipasakay sa iyang kotse didto sa parking lot sa usa ka bahin sa siyudad. Misugot.
Daghan gyod ang mahimo sa kuwarta, matud niya sa kaugalingon. Ang imposible mahimong posible. Dato man god siya. Bugtong anak sa negosyante niyang mga ginikanan.
Iyang gidala si Joy sa motel sa reclamation area. Wala mosupak. Misamot hinuon kamadanihon ang pahiyom niini. Ug sa sulod sa bugnaw'ng lawak, nakita niya ang kahamis sa hubong lawas ni Joy.
"Hinay-hinay lang, uy!" Hagawhaw ni Joy.
"Di na ko kaagwanta." Giungad niya ang iyang mga ngabil sa puting liog sa babaye. Gipanghikap ang bililhong bahin sa lawas. Daw nagsalimuang si Joy sa kanindot nga gibati.
Dugay ang ilang kombate sa kama. Nagkadungan sila pag-abot sa kinatumyan sa himaya.
"Uyab na ta, ha?" niya pa nga nag-ilis.
"Unsay uyab?" Nasuko ang babaye. "Ang bayad!" Gibukhad sa babaye ang iyang palad.
Nakapangalot siya sa iyang tingkoy. Abi niyag nakagurdo na siya, nga nakatrato na siyag guwapa, seksi ug desenteng babaye, nga dugay na niyang gipangandoy. Apan diay....
Walay kusmod nga nagkuha siyag kuwarta sa iyang pitaka ug gitunol kang Joy nga dako kaayog katawa. – Kataposan