Ang lungon ngA may pako

Sa dihang nanghiabot ang kasaulogan sa adlaw sa kalag-kalag hapit tanan tawong nangandam sa ilang pagsaulog sa kasumaran sa pagkamatay sa mga kaliwat o apohan nga nibiyahi sa laing kalibutan. Si Nanay Petra wala gayud siyay sipyat sa pagduaw sa pantiyon para managkot sa nitso sa akong Tatay Polino nga nipanaw na basta adlaw Lunes dalhan kini og mga preskong buwak diha sa tiilan nga nitso ug paga-ampoan ni Nanay Petra para maluwas ang kalag ug mabutang sa kiliran sa himaya.

Kay kini si Tatay sa maayo pa ang panglawas sus nakasimba ra sila sa akong nanay niadto pang sila gikasal. Kay si Tatay Polino ang simbahan niya mao ra intawon ang buwangan ug hantakan sa among lungsod.

Pero ang among silingan wala gayud pakabana sa ilang mga apohan nga nipanaw na kay lagi dili man sila motuo og kalag kay lahi man sila og tinuhuan mao ang ilang mga kaliwat wala jud katilaw og dagkot sa kandila ibabaw sa nitso panahon sa adlaw sa minatay o kalag-kalag.

Usa ka gabii niana nakamata ako sa sugo sa lawas ug nigawas sa among balay ug didto nagpahungaw.

Sa dihang mobalik na unta ko og saka sa taas sa among balay napugwat ako sa akong nakita nga may naglupadlupad nga lungon diha sa pultahan sa ila Nang Carmilita ug nahiugbok ako sa akong gibarogan  ug nagkurog ang akong kalawasan, namarog ang akong tingkoy perting pagpanglimbawot sa  mga balahibo sa tibuok kong kalawasan mora kog kandila nga giogbuk nga walay lihok-lihok ug nakapakapa kini ang masidlak nga lungon.

Pagka-ugma sayo kaayo nadungog sa akong dalunggan ang estorya sa pikas namong silingan nga si Noy Miguel nga nagpahibalo: "Day, day, day Carmilita sus buanga day kagabii nakakita ko og lungon diha sa inyong balay.

"Ha?" nangangha si Nang Carmilita ug dili ra diay ako ang nakakita asta sab diay si Noy Miguel mao niduol ko nila ni Nang Carmilita ug Noy Miguel.

"Nang, nang tinuod gyod na ang giingon ni Noy Miguel kay nakakita man sad ko sa lungon nga may pako."

"Ha? tinuod ka dong Maxix?" nisiga ang mga mata ni Nang Carmilita.

"O nang timaan nga hapit na ang kalag-kalag manggawas na ang mga espiritu sa kalag nga wala pa maluwas dinhi sa kalibutan ug manghasol kana sila sa mga pamilya nga walay pagtagad kanila."

Diha-diha si Nang Carmilita wala maglangay niadto dayon siya sa sam-ang ug nagpamisa sa mga kalag sa ilang mga kaliwat ug apohan nga nangamatay na ug gidagkotan sa kandila ug didto nalamdagan na ang iyang huna-huna ug nibalik na siya pag-alagad sa Ginoo diha sa simbahang Katoliko Romano. – Kataposan