Gula 19
Dili mahimong tug-anan nako si Alvin nga nangulitawo sab si Julius nako. Nabalaka ko nga basin makabaton kog problema kun tug-anan ko siya sa tinuod. Tingalig dili na gyud ko niya undangan og samok hangtod nga iya kong mapasugot.
“Layo ra sa tinuod ang imong gikabalak-an, Alvin,” giingnan ko siya.
“Dili imposible ang akong pangagpas, Jomelle,” matud ni Alvin. “Lalaki si Julius. Ug sa kadugayan ninyong panagkuyog, tingalig ma-develop kamo sa usag-usa. Daghan na ra bang nahitabo nga ingon niana.”
“Dili kana mahitabo nako, Alvin. Lahi ko sa ubang mga babaye.”
Wala na makiglantugi si Alvin kanako mahitungod sa maong isyu. Apan sa akong pangagpas, ingon sa dili siya kombinsido sa akong gipanulti.
Lapas na sa alas nuybe sa kagabhion dihang mibiya si Alvin sa akong gipuy-an. Human nako palonga ang suga sa sala, misulod dayon ko sa akong kuwarto. Maoy akong naabtan ang akong cellphone nga nagpunay og bagting. Gidali ko kini pagsusi. Si Julius diay ang nanawag. Ako dayon kining gitubag.
“Kaganina ra kong nagpunay og dayal sa imong cellphone,” ni Julius pa didto sa pikas tumoy sa linya. ‘Pero wala may mitubag.”
“Sorry kaayo,” nako pa. “Nakatulog na man god ko. Maayo gani kay nakamata na ko.”
“Kasayo ba sab nimong matulog, uy.”
“Mao kanay akong naandan. Sayo man sab kong momata labinag may klase inigkaugma. Ikaw? Wa ka pa diay matulog?”
“Gusto na unta kong matulog pero wala man ko batiag duka. Dili ko makatulog, Jomelle, sa pagsigeg hunahuna nimo.”
“J-Julius...”
“Mao kana ang tinuod, Jomelle. Abi mo, nalipay kong misugot ka nga ihatod ko ikaw kaganina sa imong gipuy-an. Mao kadtoy kanunay kong gihunahuna karon.”
Wala ko motubay sa gisulti ni Julius. Apan sa akong kaugalingon, nabatyagan ko nga gikilig ko sa gisulti niya. Daw nakapatambok kini sa akong kasingkasing. -- Sumpayan pa