Hilakan ko ang adlaw sa imong kasal, bartolo

Maliso pay buko sa kawayan, nga mausab ang kataposan kong hukom nga mosulod sa kombento ... aron mag-madre! luhaan ang duha ko ka mata nga  mipadayag ngadto kang Mama Nancy.

"Tungod ba lang sa hinungdan ... anak nga kaslonon si Bartolo, sa laing babaye?" dihay kapintok sa tuno sa pangutana sa akong biyuda nga inahan.

Wa lang kapugngi nga inanay namusikad sa pagpamalik sa akong panumdoman ang matam-is namong kaagi ni Bartolo sa dihang makapila namo dungana sa paglitok ang pulong sa pag-inunungay.

"Malawos man gani kanang usa ka pungpong nga rosas nga imong gikuptan sa tuo mong kamot ... Lisapera, apan ang gugma ko kanimo sa kanunay ... way pagkalaya ug kanunay mangalunhaw sulod sa kinatibuk-ang bahin sa akong kasingkasing!" ingon sa kinamayan ang matag pulong nga malitok sa ngabil ni Bartolo kanako.

Igo ko lang gibawsan og mananakod nga pahiyom ang maong lalaki ... diin taliwala sa kamingaw sa nagbuy-od  nga kahilom sa lapyahan ... hasta makapila namo sublia ... pagyarok ang kopa sa dili ika-pangagda nga  katagbawan nga mao ray buhing saksi ang tinapya sa mga balod nga mamisik sa among duha ka hubo nga kalawasan. Salamat na lang gani ... gikan sa kinawatkawat namong pagyinarokay sa saro sa himaya ... wa mamunga og binhi ang natisok namong duha nga kalipay.

"What is your valid reason ... Sister Lisapera, why you want to take two days ... vacation leave? Nasakit ba ang imong inahan?" kalit lang nahagtos ang nalungib nga kahalawom sa akong paghanduraw sa pangutana kanako ni Mother Superior Repsaliya Liberatso.

"Gusto lang ko mopahuway og pipila ka adlaw sa among lungsod sa San Fernando, Mother Superior," dihay kaluming sa akong tingog.

Ang tinuod ... bisan masakit ang kahapdos nga mitaroy nga punyal sa akong dughan ... gusto ko lang saksihan ang mabulokong adlaw sa kasal ni Bartolo uban kang Porlitita.

Sulod sa dakong wanang sa simbahan sa San Fernando, wa ko kapugngi ang paghilak. Kakuyapon ako nga nagsud-ong sa duha ka binuhat ... nga ang duha nila ka kasingkasing gibug-os na sa talikala sa kaminyoon.

Nakapangutana ako sa akong kaugalingon ... ngano kaha nga dili man ako ... ako ... ako ... ang gipakaslan ni Bartolo, nga unta ako man ang unang babaye nga nahimo niyang hinigugma?

Igo na lang ako nga mihagawhaw nga nagkanayon:

"Hilakan ko ang adlaw sa imong kasal, Bartolo!" – Kataposan