Buta ang gugma

Gula 12

Gihinuktokan nako ang gisulti ni Ivy. Akong gitimbangtimbang og maayo ang iyang mga sugyot mahitungod sa pagpangulitawo ni Alvin kanako.

“Hatagig assurance ang gugma ni Alvin kanimo, Jomelle,” matud ni Ivy. “Kun buhaton mo kini, iya unyang makita nga ang matuod nga gugma makaplagan lamang sa matuod nga simbahan sa Dios. Ug mas madali ang iyang pagpakatawo pag-usab.”

“Pero nahadlok ko, Ivy,” matud ko. “Dili na ko gustong masubli ang nahitabo sa relasyon namo ni Benjie. Lisod kaayo ang pagpakigrelasyon sa lalaki nga dili sama nato nga born again Christian.”

“Tinuod kana. But sometimes we have to accept the challenge. Sa gikaingon ko na, tingalig ikaw ang himuong instrumento sa Ginoo pagkabig sa usa ka tawo sa pagpaduol kaniya. Nga pinaagi sa pagdawat mo sa gugma ni Alvin, mahiduol usab siya kang Kristo. Sa ingon, mahimo na siyang sama nato ug wala na unyay babag ang inyong gugma. Mao nga tun-i ang imong kasingkasing sa paghigugma ni Alvin.”

“Akong sulayan. Pero dili ko makapasalig nga makahimo gyud ko niini. Ang kabubut-on sa Dios maoy akong agdon.”

Human sa panagsulti namo ni Ivy, misulod na ko sa akong lawak. Gipalong nako ang suga. Mao na lamay nagsiga ang lampshade nga nahimutang sa dapit sa ulohan sa akong kama. Mihigda ko aron matulog na. Apan mitingog ang message alert tone sa akong cellphone nga gipatong sa ibabaw sa lamesita. Gikab-ot ko kini.

Si Annabelle diay ang nag-text. Akong gibasa. Gi-invite ko niya alang sa iyang pagsaulog sa iyang birthday ugmang adlawa. Akong gitubag ang iyang text. Giingnan ko siya nga dili ko makapaneguro nga makatambong sa kasaulogan sa iyang birthday tungod sa akong obligasyon sa eskuylahan isip usa ka teacher.

Wala madugay, mitingog ang incoming call alert sa akong cellphone. Si Annabelle ang nanawag. Ako dayon kining gitubag.

“Birthday nako ugma,” matud ni Annabelle didto sa pikas tumoy sa linya. “Ikaw ang akong espesyal nga bisita.”

Naglisod ko pagbalibad kang Annabelle.-- Sumpayan pa