Gitutokan nako si Ivy aron sutaon kun seryoso ba siya sa iyang gisulti.
"Imo kong idudho ngadto ni Alvin?" Giingnan ko siya.
"Dili sa ingon niana, Jomelle," matud ni Ivy. "Nahinugon lang ko sa kabuotan ni Alvin. Bisan dili ko suheto sa tibuok niyang kinabuhi apan maila sa iyang mga lihok nga lahi siya sa ubang mga lalaki."
"U-unsay buot mong ipasabot?"
"Buotan si Alvin, Jomelle. Usa siya kapotential nga alagad ni Lord."
"Pero dili siya sama nato, Ivy."
"Nasayod ko. Apan kinsay nasayod nga ikaw ang himoong instrumento ni Lord aron mahiduol si Alvin Kaniya."
"Wa ko ikaw hisabti."
"Daghan og paagi ang Dios sa pagkabig sa tawo aron mahiduol kini ngadto Kaniya. Tingalig ikaw ang instrumento sa Ginoo aron mokuyog si Alvin sa Iyang panon."
"Ambot lang, Ivy. Dili ko makakomentaryo bahin niana."
"Nasayod kong in love nimo si Alvin, Jomelle. Dili siya mag-antos sa pagpangulitawo nimo sulod sa dugay nang panahon kun dilipa tinud-anay ang iyang tuyo. "Kun dawaton mo ang iyang gugma, dakog posibilidad nga makabig mo siya pagsagop sa atong pagtuo isip born again Christian."
"Unsaon naman lang unya kun sukwahi ang mahitabo? Tingalig mahimo lang unya siyang gubin sa akong pagka born again Christian ilabi na nga wa koy pagbati alang niya. Tingalig magkaproblema hinuon ko kun pugson ko gyod ang akong kaugalingon sa pagpakigrelasyon niya bisan wala ko siya higugmaa."
"Katun-an ang tanang butang, Jomelle, lakip ang gugma. Busa tun-i ang imong kaugalingon sa paghigugma kang Alvin. Pangayog enlightenment gikan ni Lord aron imong masayran kun unsay plano sa Dios alang ninyo ni Alvin."
"Gisulayan na nakog kombinser si Alvin pag-join sa atong pagtuo pero wala pa siya makahukom."
"Mas madali ang iyang paghukom ku n pakit-on mo siyag paglaom, Jomelle." – Sumpayan pa